(SIKKA, ឥណ្ឌូណេស៊ី)៖ អាជ្ញាធរឥណ្ឌូណេស៊ី នៅថ្ងៃអាទិត្យ ទី១៦ ខែសីហា ឆ្នាំ២០២៦ បានឱ្យដឹងថាមនុស្សប្រហែល ៥០០០នាក់ ត្រូវបានជម្លៀស បន្ទាប់ពីគ្រោះរញ្ជួយដីកម្រិត ៧,៧រ៉ិចទ័រ បានវាយប្រហារលើតំបន់ភាគខាងកើតនៃប្រទេស ដោយសម្លាប់មនុស្សយ៉ាងហោច ៥១នាក់ ព្រមទាំងបង្កជាគ្រោះរអិលបាក់ដី និងផ្លូវថ្នល់មួយចំនួនត្រូវបានផ្អាកការធ្វើចរាចរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុងកិច្ចប្រជុំមួយចាក់ផ្សាយតាមទូរទស្សន៍ អនុរដ្ឋមន្ត្រីក្រសួងសុខាភិបាល លោក Benjamin Paulus បានបញ្ជាក់ថាមនុស្ស ៣៦នាក់ក៏បានរងរបួសធ្ងន់ផងដែរនៅក្នុងគ្រោះរញ្ជួយដី កាលពីថ្ងៃសៅរ៍ម្សិលមិញ នៅខេត្ត East Nusa Tenggara និង ៧៧នាក់រងរបួសស្រាល។ គ្រោះរញ្ជួយដីនេះដែរដែលបង្កឱ្យមានរំញ័រតូចៗ ៣៤១លើក គឺជាគ្រោះរញ្ជួយដីដ៏សាហាវមួយដែលបានវាយប្រហារលើឥណ្ឌូណេស៊ី ចាប់តាំងពីគ្រោះរញ្ជួយដីកាលពីឆ្នាំ២០២២ បានសម្លាប់មនុស្សរាប់រយនាក់នៅខេត្ត West Java។

គួរបញ្ជាក់ថា រដ្ឋាភិបាលឥណ្ឌូណេស៊ី បានដាក់ពង្រាយយោធា និងប៉ូលិស ៣៥០០នាក់ ទៅកាន់តំបន់រងគ្រោះ ហើយភ្លាមៗមិនទាន់មានការបញ្ជាក់ថាតើមានមនុស្សបាត់ខ្លួនចំនួនប៉ុន្មាន នាក់នោះទេ ប៉ុន្តែភាគច្រើននៃអ្នកដែលត្រូវបានរាយការណ៍ថាបានបាត់ខ្លួន កំពុងជាប់នៅក្រោមគំនរបែកបាក់ និងផ្ទះ១៣០០ខ្នងរងការខូចខាត៕