(Reuters)៖ តម្លៃប្រេងឆៅ បានកើនឡើងក្នុងរង្វង់ ១ភាគរយ នាថ្ងៃចន្ទ ទី១៧ ខែសីហា ឆ្នាំ២០២៦ ខណៈក្តីរំពឹងលើការសម្រេចបាននូវរបត់វិជ្ជមាន ឆ្ពោះទៅរកសន្តិភាពរវាងសហរដ្ឋអាមេរិក និងអ៉ីរ៉ង់បានថមថយ ស្របពេលដែលចរាចរណ៍នាវាដឹកប្រេងចេញតាមច្រកសមុទ្រ Hormuz ក៏ថយចុះផងដែរ ដោយបង្កើនក្តីបារម្ភអំពីហានិភ័យភូមិសាស្ត្រនយោបាយក្នុងទីផ្សារ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ប្រេងឆៅប្រភេទ Brent មានតម្លៃ ៨៩,៤០ដុល្លារក្នុងមួយបារ៉ែល រីឯប្រេងឆៅអាមេរិក West Texas Intermediate មានតម្លៃ ៨២,៨៣ដុល្លារក្នុងមួយបារ៉ែល។ តម្លៃប្រេងទាំងពីរនេះ បានហក់ឡើងជាង ៥ភាគរយ កាលពីសប្តាហ៍មុន ក្រោយការវាយប្រហារលើនាវាដឹកប្រេងក្រុមហ៊ុន Abu Dhabi National នៅច្រកសមុទ្រ Hormuz និងលើរោងចក្រចម្រាញ់ប្រេងរបស់ក្រុមហ៊ុន Saudi Aramco របស់ប្រទេសអារ៉ាប់ប៊ីសាអូឌីត។

ទិន្នន័យតាមដានចរាចរណ៍ផ្លូវសមុទ្រពី Kpler នៅថ្ងៃចន្ទនេះ បង្ហាញថាសកម្មភាពដឹកជញ្ជូនតាមច្រកសមុទ្រ Hormuz មានសភាពយឺតយ៉ាវ កាលចុងសប្តាហ៍កន្លងទៅ បន្ទាប់ពីមានការវាយប្រហាខាងលើ។ នៅថ្ងៃសៅរ៍ តែមាននាវាដឹកទំនិញចំនួន ៥គ្រឿងប៉ុណ្ណោះ បានធ្វើដំណើរឆ្លងកាត់ច្រកសមុទ្រ Hormuz ហើយគ្មាននាវាណាមួយបានចុះឈ្មោះឆ្លងកាត់ទេ នៅថ្ងៃអាទិត្យ៕