(គែរ)៖ ទីភ្នាក់ងារសារព័ត៌មានរដ្ឋអូម៉ង់ បានរាយការណ៍នៅថ្ងៃចន្ទថា ស្ថានភាពអាកាសធាតុអាក្រក់ និងបញ្ហាប្រឈមផ្នែកប្រតិបត្តិការ កំពុងរារាំងដល់កិច្ចខិតខំប្រឹងប្រែងសង្គ្រោះនាវាដឹកប្រេងដែលកំពុងជាប់គាំង និងលេចធ្លាយប្រេងឆៅរុស្ស៊ី នៅក្នុងតំបន់អភិរក្សសមុទ្រក្បែរឆ្នេរប្រទេសអូម៉ង់។ នេះបើតាមការចេញផ្សាយដោយបណ្តាញព័ត៌មានអន្តរជាតិ។

រដ្ឋាភិបាលអូម៉ង់ កំពុងសហការជាមួយក្រុមហ៊ុនគ្រប់គ្រងហានិភ័យ Ambrey ដើម្បីទប់ស្កាត់ការខូចខាតបរិស្ថានពីការលេចធ្លាយប្រេងនេះ ដែលការប៉ាន់ស្មានខ្លះអះអាងថាមានទំហំដល់ទៅ ២,០០០គីឡូម៉ែត្រការ៉េ។ ការលេចធ្លាយពីនាវា Caroline Bezengi ដែលសង្ស័យថាបណ្តាលមកពីការវាយប្រហារកាលពីខែមិថុនា បានរាលដាលជុំវិញតំបន់អភិរក្សធម្មជាតិ និងបានរសាត់មកដល់ឆ្នេរសមុទ្រអូម៉ង់កាលពីថ្ងៃពុធ។

អគ្គនាយកកិច្ចការលំហសមុទ្រនៃក្រសួងដឹកជញ្ជូនអូម៉ង់ បានបញ្ជាក់ថា ភាពលំបាកគឺបណ្តាលមកពីរដូវមូសុង និងស្ថានភាពភូមិសាស្ត្ររាក់ និងសំបូរថ្មនៅកន្លែងដែលនាវាជាប់គាំង ដែលធ្វើឱ្យនាវាសង្គ្រោះប្រឈមនឹងហានិភ័យយ៉ាងខ្លាំង។ លោកបានបន្ថែមថា ប្រតិបត្តិការនេះកាន់តែស្មុគស្មាញ ដោយសារនាវារងការខូចខាត និងមានទឹកលិចផ្នែកម្ខាងយ៉ាងធ្ងន់ធ្ងរ។

គួរបញ្ជាក់ថា នាវាដែលផ្ទុកប្រេងរុស្ស៊ីប្រមាណ ៨០ម៉ឺនធុងនេះ បានជាប់គាំងកាលពីថ្ងៃទី៣០ ខែមិថុនា នៅក្បែរតំបន់អភិរក្សសមុទ្រអូម៉ង់ ដែលជាជម្រករបស់ត្រីបាឡែន និងសត្វកម្រជាច្រើន។ នាវានេះគឺជាផ្នែកមួយនៃ «កងនាវាសម្ងាត់» របស់រុស្ស៊ី ដែលប្រើប្រាស់នាវាចាស់ៗ គ្មានធានារ៉ាប់រងពីលោកខាងលិច និងប្តូរទង់ជាតិដើម្បីលាក់បាំងអត្តសញ្ញាណម្ចាស់ពិតប្រាកដ ខណៈដែលនាវានេះកំពុងស្ថិតក្រោមទណ្ឌកម្មរបស់សហភាពអឺរ៉ុប អ៊ុយក្រែន អង់គ្លេស កាណាដា និងស្វីស៕