(មុមបៃ)៖ រដ្ឋមន្ត្រីមហាផ្ទៃឥណ្ឌា លោក អាមីត សា (Amit Shah) បានប្រកាសនៅថ្ងៃចន្ទថា ទីភ្នាក់ងារសន្តិសុខឥណ្ឌាបានចាប់ខ្លួន «ភ្នាក់ងារភេរវករ» ជាង ២០០នាក់ ដែលមានទំនាក់ទំនងជាមួយប្រទេសប៉ាគីស្ថាន ដោយបានទប់ស្កាត់ការប៉ុនប៉ងវាយប្រហារនៅទូទាំងប្រទេស ក្នុងអំឡុងពេលទិវាបុណ្យឯករាជ្យជាតិកាលពីសប្តាហ៍មុន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ប្រតិបត្តិការបង្ក្រាបទ្រង់ទ្រាយធំនេះ ត្រូវបានធ្វើឡើងនៅទូទាំងរដ្ឋចំនួន ១៤ កាលពីថ្ងៃទី១២ ខែសីហា ពោលគឺបីថ្ងៃមុនពេលឥណ្ឌាប្រារព្ធខួបឯករាជ្យជាតិ។ លោក សា បានចោទប្រកាន់ថា ក្រុម Shahzad Bhatti Network នេះ ទទួលបានការគាំទ្រពីទីភ្នាក់ងារចារកម្ម ISI របស់ប៉ាគីស្ថាន។

លោកបានបញ្ជាក់ថា សមត្ថកិច្ចបានរឹបអូសកាំភ្លើងខ្លី គ្រាប់កាំភ្លើង គ្រាប់បែកដៃដែលមានស្លាកសញ្ញារោងចក្រអាវុធប៉ាគីស្ថាន និងគ្រាប់បែកកែច្នៃជាច្រើន។ ទោះជាយ៉ាងណា អ្នកនាំពាក្យក្រសួងការបរទេសប៉ាគីស្ថាន មិនទាន់មានការឆ្លើយតបនៅឡើយទេ ខណៈដែលកន្លងមកប៉ាគីស្ថានតែងតែបដិសេធការចោទប្រកាន់បែបនេះ។

គួរបញ្ជាក់ថា ឥណ្ឌា និងប៉ាគីស្ថាន តែងតែចោទប្រកាន់គ្នាទៅវិញទៅមកថាជាអ្នកនៅពីក្រោយអំពើភេរវកម្មនៅក្នុងប្រទេសរៀងៗខ្លួន។ កាលពីឆ្នាំមុន ប្រទេសមហាអំណាចនុយក្លេអ៊ែរទាំងពីរនេះ ធ្លាប់បានប៉ះទង្គិចយោធាគ្នារយៈពេល ៤ថ្ងៃ បន្ទាប់ពីឥណ្ឌាបានទម្លាក់កំហុសលើប៉ាគីស្ថាន ចំពោះការសម្លាប់មនុស្ស ២៦នាក់ នៅតំបន់កាស្មៀររបស់ឥណ្ឌា៕