(ព្រុចសែល)៖ ប្រមុខគោលនយោបាយការបរទេសនៃសហភាពអឺរ៉ុប (EU) លោកស្រី កាយ៉ា កាឡាស់ (Kaja Kallas) បានប្រកាសថា ប្លុកអឺរ៉ុបមួយនេះមានបំណងពង្រីកទណ្ឌកម្មប្រឆាំងនឹងប្រទេសរុស្ស៊ីយ៉ាងខ្លាំងក្លា នៅក្នុងប៉ុន្មានខែខាងមុខនេះ ជុំវិញសង្គ្រាមនៅអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោកស្រី កាឡាស់ ដែលជាប្រធានស្ថាប័នការទូតអឺរ៉ុប (EEAS) បានប្រាប់កាសែតអាល្លឺម៉ង់ Die Welt ថា «ទណ្ឌកម្មរបស់ EU កន្លងមក បានធ្វើឱ្យរុស្ស៊ីខាតបង់យ៉ាងធ្ងន់ធ្ងរ ដោយបានកាត់ផ្តាច់ប្រភពហិរញ្ញវត្ថុសម្រាប់ម៉ាស៊ីនសង្គ្រាមរបស់រុស្ស៊ីអស់ជាង ១ទ្រីលានអឺរ៉ូ (ប្រមាណ ១,១៦ទ្រីលានដុល្លារ)។ សម្រាប់រដូវស្លឹកឈើជ្រុះខាងមុខនេះ ខ្ញុំនឹងស្នើឡើងនូវបញ្ជីទណ្ឌកម្មដ៏ធំទូលាយបំផុតមិនធ្លាប់មាន ចាប់តាំងពីសង្គ្រាមបានផ្ទុះឡើង»។

លោកស្រីបានសង្កត់ធ្ងន់ថា ប្រសិនបើត្រូវបានអនុម័ត ទណ្ឌកម្មថ្មីនេះនឹងធ្វើឱ្យចំនួនស្ថាប័នរុស្ស៊ីដែលរងទណ្ឌកម្មកើនឡើងមួយភាគបីភ្លាមៗ ហើយសម្ពាធនេះត្រូវតែបន្តកើនឡើងរហូតទាល់តែទីក្រុងមូស្គូព្រមបញ្ចប់សង្គ្រាម។

ទោះបីជាលោកស្រីមិនបានបញ្ជាក់លម្អិតពីពេលវេលា ឬគោលដៅទណ្ឌកម្មថ្មីនេះក៏ដោយ ប៉ុន្តែប្រភពការទូត EU បានបង្ហើបប្រាប់ Reuters ថា EEAS នឹងស្នើដាក់ទណ្ឌកម្មលើបុគ្គល និងស្ថាប័នប្រមាណ ១,៦០០ ដែលមានមូលដ្ឋាននៅរុស្ស៊ី ដោយផ្តោតសំខាន់លើបណ្តាញឧស្សាហកម្មយោធារបស់ទីក្រុងមូស្គូ។ ប្រភពបានបន្ថែមថា ទណ្ឌកម្មទាំងនោះនឹងរួមបញ្ចូលទាំងការហាមឃាត់ការធ្វើដំណើរ ការហាមឃាត់ប្រតិបត្តិការហិរញ្ញវត្ថុ និងការបង្កកទ្រព្យសម្បត្តិ។ គួរបញ្ជាក់ថា មកទល់ពេលនេះ EU បានដាក់ទណ្ឌកម្មលើបុគ្គល និងក្រុមហ៊ុនរុស្ស៊ីជិត ៣,០០០ រួចមកហើយ៕