(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារ ទី១៨ ខែសីហា ឆ្នាំ២០២៦ បានបង្ហោះរូបភាពផែនទីមួយលើបណ្ដាញទំនាក់ទំនងសង្គម Truth Social ដែលបង្ហាញថាច្រកសមុទ្រ Hormuz ជាទឹកដីថ្មីរបស់សហរដ្ឋអាមេរិក «NEW US Territory»។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

លោក ត្រាំ បានលើកឡើងដំបូងពីគំនិតចង់គ្រប់គ្រងច្រកសមុទ្រ Hormuz កាលពីថ្ងៃទី១៤ ខែសីហា ដោយនិយាយថាលោកអាចនឹងប្រកាសថាច្រកសមុទ្រនេះនឹងក្លាយជាទឹកដីរបស់សហរដ្ឋអាមេរិកក្នុងពេលឆាប់ៗ ជំរុញឱ្យអ៉ីរ៉ង់ឆ្លើយតបវិញដោយចាត់ទុកថា Hormuz ជាកម្មសិទ្ធិរបស់អ៉ីរ៉ង់។ លោក ត្រាំបានលើកឡើងជាថ្មីពីគំនិតនេះកាលពីថ្ងៃទី១៧ ខែសីហា នៅចំពោះមុខក្រុមអ្នកសារព័ត៌មាននៅឯសេតវិមានដោយសង្កត់ធ្ងន់ថានេះជាគំនិតល្អមួយ។

នេះមិនមែនជាលើកទី១នោះទេដែលលោក ត្រាំ ក្នុងពេលប្រឈមមុខនឹងភាពស្មុគស្មាញខាងគោលនយោបាយការបរទេស បានគំរាមគ្រប់គ្រងលើទឹកដីនៅឯបរទេស។ ចាប់តាំងពីត្រឡប់មកកាន់តំណែងជាប្រធានាធិបតីអាមេរិកសម្រាប់អាណត្តិទី២ កាលពីខែមករា ឆ្នាំ២០២៥មក លោកបានគំរាមបញ្ចូលកាណាដាទៅជារដ្ឋទី៥១ របស់សហរដ្ឋអាមេរិក ដណ្ដើមគ្រប់គ្រងដែនដី Greenland និងគ្រប់គ្រងលើតំបន់ហ្កាហ្សា។

គួរបញ្ជាក់ថា នៅមុនសង្រ្គាមអ៉ីរ៉ង់ផ្ទុះឡើងកាលពីថ្ងៃទី២៨ ខែកុម្ភៈកន្លងទៅ ច្រកសមុទ្រ Hormuz បានបើកចំហ និងជាផ្លូវទឹកអន្តរជាតិមួយ។ អ៉ីរ៉ង់បានអះអាងថាខ្លួននឹងមិនបើកច្រកសមុទ្រនេះឡើងវិញនោះទេ រហូតទាល់តែសហរដ្ឋអាមេរិកបំពេញតាមលក្ខខណ្ឌដែលខ្លួនត្រូវការ ក្នុងនោះរួមមានលុបចោលការបិទខ្ទប់របស់សហរដ្ឋអាមេរិកលើកំពង់ផែអ៉ីរ៉ង់ បញ្ចេញទ្រព្យសម្បត្តិរបស់អ៉ីរ៉ង់ដែលត្រូវបានបង្កក និងសងជំងឺចិត្តសម្រាប់ការខូចខាតដោយសារសង្រ្គាម៕