(ប៉ារីស)៖ ប្រទេសបារាំង នឹងបណ្តេញអ្នកការទូតអ៉ីរ៉ង់ចំនួន ២រូបចេញពីប្រទេស ក្នុងពេលប៉ុន្មានថ្ងៃខាងមុខ ដើម្បីឆ្លើយតបទៅនឹងហេតុការណ៍មួយ កាលពីខែកក្កដា ពាក់ព័ន្ធបញ្ហាបុគ្គលិកស្ថានទូតបារាំងប្រចាំទីក្រុងតេហេរ៉ង់ ចំនួន ២រូបដែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី១៩ ខែសីហា ឆ្នាំ២០២៦។

រដ្ឋមន្រ្តីការបរទេសបារាំង លោក Jean-Noel Barrot បានបញ្ជាក់នៅលើបណ្តាញសង្គម X យ៉ាងដូច្នេះថា «ខ្ញុំធ្លាប់បានប្រកាសថា សកម្មភាពដែលមិនអាចទទួលយកបាន នឹងនាំមកនូវផលវិបាក ហើយវាក៏បានកើតឡើងមែន ដោយអ្នកការទូតអ៉ីរ៉ង់ ២រូបប្រចាំនៅប្រទេសបារាំង នឹងត្រូវបណ្តេញចេញ ក្នុងពេលដ៏ខ្លីខាងមុខនេះ»។

ក្រសួងការបរទេសបារាំង បានឱ្យដឹងថា បុគ្គលិកស្ថានទូតបារាំង ២នាក់ ត្រូវបានអាជ្ញាធរសន្តិសុខអ៉ីរ៉ង់ ឃាត់ខ្លួន និងគំរាមកំហែងដោយប្រើអំពើហិង្សា ក្នុងទីក្រុងតេហេរ៉ង់ នៅថ្ងៃទី១៩ ខែកក្កដា។ ក្រសួងការបរទេសអ៉ីរ៉ង់ ថាបុគ្គលិកបារាំង ២នាក់ បានបំពានអនុសញ្ញាទីក្រុងវីយែន ដែលកំណត់អំពីច្បាប់ និងសិទ្ធិនៃបេសកកម្មការទូត តាមរយៈការចូលរួមសកម្មភាពគាំទ្រដល់អង្គការសង្គមស៉ីវិលនៅអ៉ីរ៉ង់។

ជុំវិញចំណាត់ការថ្មីរបស់បារាំងនាពេលនេះ អ៉ីរ៉ង់នៅមិនទាន់ធ្វើអត្ថាធិប្បាយទេ៕