(បូហ្គោតា)៖ ប្រធានាធិបតីកូឡុំប៊ី លោក Abelardo de la Espriella កាលពីថ្ងៃអង្គារ ទី១៨ ខែសីហា ឆ្នាំ២០២៦ បាននិយាយថា គ្រោះរញ្ជួយដីដ៏ខ្លាំងក្លាមួយ ដែលបានសម្លាប់មនុស្សរាប់រយនាក់ នៅភាគខាងលិចប្រទេស បានបង្កការខាតបង់ផ្នែកសេដ្ឋកិច្ចទំហំប្រហែលខ្ទង់ ៩,៥៧ពាន់លានដុល្លារ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

រញ្ជួយដីកម្រិត ៧,៤រ៉ិចទ័រ ដែលបានវាយប្រហារកាលពីថ្ងៃទី១០ ខែសីហា គឺជារញ្ជួយដីដ៏ខ្លាំងក្លាបំផុតនៅប្រទេសកូឡុំប៊ី គិតក្នុងរយៈពេលជិតកន្លះសតវត្សរ៍។ តាមតួលេខផ្លូវការចុងក្រោយបង្អស់ អ្នកស្លាប់មានចំនួន២៨៩នាក់ របួស៤១៨៧នាក់ និងបាត់ខ្លួន ១៤៣នាក់។ ផ្ទះសម្បែងជិត ២៧ ០០០ខ្នង ត្រូវបានបំផ្លាញ បន្សល់ទុកឲ្យមនុស្សជាច្រើន ត្រូវដេកនៅតាមដងផ្លូវ ឬសួនសាធារណៈ។ លើសពីនេះ មន្ទីរពេទ្យនិងសាលារៀនរាប់សិបកន្លែង ក៏បានដួលរលំ ឬរងការខូចខាតផងដែរ។

លោក De la Espriella គឺជាអ្នកនយោបាយជើងថ្មី ទើបចូលកាន់តំណែងបានតែ៣ថ្ងៃ មុនគ្រោះមហន្តរាយខាងលើ។ វិបត្តិនេះជាការសាកល្បងដ៏លំបាកដំបូងបំផុត សម្រាប់លោក De la Espriella ដែលជាមេធាវីនិងមហាសេដ្ឋីធុរកិច្ចប្រកាន់និន្នាការនយោបាយស្តាំនិយម និងត្រូវបានបោះឆ្នោតជ្រើសរើសជាមេដឹកនាំកូឡុំប៊ីថ្មី ក្រោមពាក្យសន្យាចាត់វិធានការបោសសម្អាត ក្រុមឧទ្ទាមជួញដូរគ្រឿងញៀន ដែលគ្រប់គ្រងកាន់កាប់ផ្នែកខ្លះនៃប្រទេសអាមេរិកឡាទីនមួយនេះ។

គួរបញ្ជាក់ថា កាលពីថ្ងៃអង្គារ លោកប្រធានាធិបតី បានអះអាងថា រូបលោកបានចាត់តាំង រដ្ឋមន្ត្រីក្រសួងលំនៅឋានរបស់លោក ឲ្យចាប់ផ្តើមផែនការស្ថាបនាឡើងវិញ ដោយមានការគាំទ្រពីវិស័យឯកជន។ ប៉ុន្តែលោករដ្ឋមន្ត្រី Jaime Andres Beltran បានស្ថិតក្រោមការរិះគន់យ៉ាងខ្លាំង ជុំវិញការនាំគ្រួសារទៅលេងកម្សាន្តនៅឯឆ្នេរសមុទ្រ ចំពេលដែលប្រទេសទើបតែរងគ្រោះ​ធ្ងន់ធ្ងរដោយសាររញ្ជួយដី៕