(គីនស្ហាសា)៖ ទិន្នន័យរដ្ឋាភិបាលនៅឯប្រទេសកុងហ្គោ បានបង្ហាញកាលពីយប់ថ្ងៃអង្គារ ទី១៨ ខែសីហា ឆ្នាំ២០២៦ ឱ្យឃើញថា ចំនួនករណីឆ្លងជំងឺអេបូឡា នៅក្នុងប្រទេសអាហ្វ្រិកមួយនេះ ឥឡូវបានកើនលើស ៥០០០ករណីហើយ ខណៈដែលក្រុមមន្ត្រីសុខាភិបាលព្រមានថា កិច្ចខិតខំប្រឹងប្រែងឆ្លើយតបនៅតែបរាជ័យ ក្នុងការគ្រប់គ្រងជំងឺដ៏កាចសាហាវនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

វិទ្យាស្ថានសុខភាពសាធារណៈរបស់កុងហ្គោ បានឱ្យដឹងថា ការរាតត្បាតជំងឺអេបូឡាលើកទី១៧នេះ នៅក្នុងប្រទេសរបស់ខ្លួន កាលពីចុងខែកក្កដាកន្លងទៅ បានក្លាយជា ការឆ្លងរាតត្បាតដ៏ធំបំផុតក្នុងប្រវត្តិសាស្ត្ររបស់ប្រទេស បើគិតតាមចំនួនករណីឆ្លង ហើយកាលពីចុងសប្តាហ៍មុននេះ ចំនួនអ្នកស្លាប់បានកើនដល់ ២៣៧៨នាក់ ពោលគឺលើសពីការផ្ទុះរាលដាលដ៏អាក្រក់បំផុត កាលលើកពីមុន អំឡុងចន្លោះឆ្នាំ២០១៨-២០២០ ទៅទៀត។

វិទ្យាស្ថានខាងលើ រហូតមកដល់ពេលនេះ បានកត់ត្រាការឆ្លងសរុប ៥០២១ករណី ដែលធ្វើឱ្យវាក្លាយជា ការឆ្លងរាលដាលដ៏អាក្រក់បំផុតទីពីរនៅលើពិភពលោក បន្ទាប់ពីការរាតត្បាត អំឡុងឆ្នាំ២០១៤ ដល់២០១៦ នៅអាហ្វ្រិកខាងលិច ដោយគិតទាំងចំនួនករណីឆ្លង និងករណីស្លាប់។

គួរបញ្ជាក់ថា ការផ្ទុះរាលដាលលើកនេះ គឺបណ្តាលមកពីវីរុសអេបូឡាប្រភេទកម្រ ហៅថា Bundibugyo ដែលមិនទាន់មានវ៉ាក់សាំង ឬវិធីព្យាបាលជាក់លាក់ណាមួយ ដែលត្រូវបានអនុម័តឱ្យប្រើប្រាស់ជាផ្លូវការនៅឡើយ៕