(សេអ៊ូល)៖ រដ្ឋមន្ត្រីការបរទេសកូរ៉េខាងត្បូង លោក Cho Hyun នៅថ្ងៃពុធ ទី១៩ ខែសីហា ឆ្នាំ២០២៦ បានលើកឡើងថា បទបញ្ជារបស់ប្រធានាធិបតីអាមេរិក លោក ដូណាល់ ត្រាំ ឱ្យកាត់បន្ថយសមយុទ្ធយោធារួមគ្នា ហាក់ដូចជាមានគោលបំណងមួយផ្នែក គឺដើម្បីដាក់សម្ពាធលើទីក្រុងសេអ៊ូល ឱ្យគាំទ្រកិច្ចខិតខំប្រឹងប្រែងរបស់សហរដ្ឋអាមេរិក ក្នុងសង្គ្រាមអ៉ីរ៉ង់ រួមជាមួយបញ្ហាដែលមិនទាន់ដោះស្រាយផ្សេងទៀត ដូចជាការវិនិយោគជាដើម។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Cho បានលើកឡើងដូច្នេះថា «ខ្ញុំគិតថា សាររបស់ប្រធានាធិបតី ត្រាំ រួមបញ្ចូលទាំងសម្ពាធលើបញ្ហាមិនទាន់ដោះស្រាយរួចមួយចំនួន ទាក់ទងជាមួយរដ្ឋាភិបាលកូរ៉េខាងត្បូង ព្រមទាំងជាសារមួយទៅកាន់កូរ៉េខាងជើង ហើយក៏ជាចេតនាមួយផងដែររបស់សហរដ្ឋអាមេរិក ក្នុងការបំបែកភាពជាប់គាំងក្នុងសង្គ្រាមអ៉ីរ៉ង់»។

លោក Cho បានបន្តថា មួយទៀតដែលអាចជាប្រភពនៃភាពតានតឹងនេះ គឺការសន្យារបស់កូរ៉េខាងត្បូងក្នុងការវិនិយោគ ៣៥០ពាន់លានដុល្លារនៅសហរដ្ឋអាមេរិក ក្រោម​កិច្ចព្រមព្រៀងពាណិជ្ជកម្ម ដែលបានចុះហត្ថលេខា កាលពីឆ្នាំ២០២៥។ ទីក្រុងសេអ៊ូល មិនទាន់បានប្រកាសលម្អិតអំពីផែនការវិនិយោគនេះនៅឡើយទេ ទោះបីជាលោក Cho បាននិយាយថា ទីក្រុងវ៉ាស៊ីនតោន បានផ្ញើសំណើមួយមកទីក្រុងសេអ៊ូល រៀបរាប់ពីគម្រោងដែលអាចត្រូវពិចារណាក៏ដោយ។

គួរបញ្ជាក់ថា កូរ៉េខាងត្បូង និងសហរដ្ឋអាមេរិក បានប្រកាសនៅថ្ងៃពុធនេះថា ពួកគេនឹងបន្ថយការធ្វើសមយុទ្ធយោធាប្រចាំឆ្នាំ ពីរយៈពេល ១១ថ្ងៃ មកនៅត្រឹម៥ថ្ងៃប៉ុណ្ណោះ ហើយលុបចោលការហ្វឹកហ្វឺនជាក់ស្តែងមួយចំនួន បន្ទាប់ពីការបញ្ជារបស់លោក លោក ត្រាំ ដែលឱ្យកាត់បន្ថយការចូលរួមរបស់អាមេរិកយ៉ាងច្រើន។

រីឯរដ្ឋមន្ត្រីក្រសួងបង្រួបបង្រួមរបស់កូរ៉េខាងត្បូង លោក Chung Dong-young ក៏បានលើកឡើងដែរថា លោកជឿថា លោក ត្រាំ ហាក់កំពុងឈានទៅរកការរៀបចំកិច្ចប្រជុំថ្មីមួយ ជាមួយមេដឹកនាំកូរ៉េខាងជើង លោក គីម ជុងអ៊ុន ទើបសម្រេចចិត្តកាត់បន្ថយសមយុទ្ធរួមជាមួយកូរ៉េខាងត្បូង ដែលជាប្រភពបានធ្វើឱ្យទីក្រុងព្យុងយ៉ាង ខឹងសម្បារជាយូរមកហើយ៕