(កុលកាតា)៖ ប៉ូលិសក្នុងតំបន់ និងក្រសួងការបរទេសបង់ក្លាដែសបានឱ្យដឹងថាមនុស្សយ៉ាងហោច ៩នាក់ ក្នុងនោះរួមមានជនជាតិបង់ក្លាដែស ៥នាក់ បានស្លាប់បាត់បង់ជីវិតនៅក្នុងហេតុការណ៍គ្រោះអគ្គិភ័យឆាបឆេះសណ្ឋាគារមួយកន្លែង ស្ថិតនៅឯទីក្រុង Kolkata ភាគខាងកើតប្រទេសឥណ្ឌា នៅថ្ងៃពុធនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៩ ខែសីហា ឆ្នាំ២០២៦។

មន្ត្រីប៉ូលិសជាន់ខ្ពស់ម្នាក់បានប្រាប់ Reuters ថា អគ្គិភ័យបានឆាបឆេះឡើងនៅវេលាម៉ោងប្រមាណ ២៖៥០ នាទីទៀបភ្លឺ នៅជាន់ទីពីរនៃអគារសណ្ឋាគារ ហើយត្រូវបានគ្រប់គ្រងបានទាំងស្រុងក្នុងរយៈពេលប្រហែលមួយម៉ោងក្រោយមក។ មន្ត្រីរូបនេះបានបន្ថែមថាក្នុងចំណោមអ្នកស្លាប់ ក៏មានកុមារម្នាក់ផងដែរ ខណៈមូលហេតុនៃការឆាបឆេះអាចបណ្តាលមកពីការឆ្លងចរន្តអគ្គិសនី។

ក្រសួងការបរទេសបង់ក្លាដែសបានបញ្ជាក់ថា ជនជាតិបង់ក្លាដែស ៤នាក់ក្នុងចំណោម ៥នាក់ដែលបានស្លាប់ គឺជាសមាជិកក្នុងគ្រួសារតែមួយ ហើយពលរដ្ឋបង់ក្លាដែស ៦នាក់ផ្សេងទៀតបានរងរបួសស្រាល និងត្រូវបានអនុញ្ញាតឱ្យចាកចេញពីមន្ទីរពេទ្យបន្ទាប់ពីទទួលបានការសង្គ្រោះបឋម។ ជនរងគ្រោះជនជាតិបង់ក្លាដែសទាំងនោះ ត្រូវបានគេដឹងថាបានធ្វើដំណើរមកកាន់ទីក្រុង Kolkata ក្នុងគោលបំណងដើម្បីទទួលការព្យាបាលជំងឺ។

បើតាមរដ្ឋមន្ត្រីទទួលបន្ទុកសេវាពន្លត់អគ្គិភ័យនៃរដ្ឋ Bengal ខាងលិច លោក Koushik Chowdhury មនុស្សប្រមាណ ៨០នាក់ត្រូវបានជួយសង្គ្រោះចេញពីកន្លែងកើតហេតុដោយសុវត្ថិភាព។

គួរបញ្ជាក់ថា ប្រមុខរដ្ឋាភិបាលប្រចាំរដ្ឋ លោក Suvendu Adhikari បានបង្ហោះនៅលើបណ្តាញសង្គម X ថា ក្រុមការងារជំនាញដែលមានសមាជិក ៥នាក់ត្រូវបានបង្កើតឡើង ដើម្បីបើកការស៊ើបអង្កេតយ៉ាងទូលំទូលាយលើហេតុការណ៍ដ៏អកុសលនេះ។ សណ្ឋាគារកើតហេតុខាងលើ ស្ថិតនៅក្នុងតំបន់ប្រជុំជនដ៏ចង្អៀតមួយនៅចំកណ្តាលទីក្រុង ដែលសម្បូរទៅដោយកន្លែងស្នាក់នៅតម្លៃសមរម្យ និងភោជនីយដ្ឋានជាច្រើន៕