(ប៉ារីស)៖ រដ្ឋមន្ត្រីការបរទេសបារាំង លោក Jean-Noel Barrot បានថ្កោលទោសអំពើហិង្សារបស់ក្រុមអ្នកតាំងលំនៅអ៉ីស្រាអែលប្រឆាំងនឹងជនជាតិប៉ាឡេស្ទីននៅតំបន់ West Bank ដោយគូសបញ្ជាក់ថា នេះជាមូលហេតុសមស្របដែលបារាំងសម្រេចដាក់ទណ្ឌកម្មលើរដ្ឋមន្ត្រីសន្តិសុខជាតិស្ដាំនិយមជ្រុលអ៉ីស្រាអែល លោក Itamar Ben-Gvir។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅលើបណ្តាញ

សង្គម X លោក Barrot បានបញ្ជាក់ដូច្នេះថា «អ្វីដែលកំពុងកើតឡើងនៅតំបន់ West Bank គឺជារឿងគួរឱ្យអាម៉ាស់បំផុត... នេះជាមូលហេតុដែលយើងដាក់ទណ្ឌកម្មលើលោក Ben-Gvir ដែលការលើកឡើងរបស់លោកគឺមិនអាចទទួលយកបាន»។ លោកបានបន្ថែមថា បារាំងអាចនឹងអនុវត្តទណ្ឌកម្មបន្ថែមលើក្រុមអ្នកតាំងលំនៅដែលពាក់ព័ន្ធនឹងអំពើហិង្សា ខណៈកាលពីខែឧសភា បារាំងបានហាមឃាត់លោក Ben-Gvir មិនឱ្យចូលទឹកដីរបស់ខ្លួននោះឡើយ។

គួរបញ្ជាក់ថា សហគមន៍អន្តរជាតិ និងអង្គការសហប្រជាជាតិចាត់ទុកការតាំងលំនៅដ្ឋានរបស់អ៉ីស្រាអែលនៅលើទឹកដីដែលបានកាន់កាប់ក្នុងសង្គ្រាមឆ្នាំ១៩៦៧ ថាជាទង្វើខុសច្បាប់អន្តរជាតិ ប៉ុន្តែអ៉ីស្រាអែលតែងតែច្រានចោល និងបានចោទបណ្តាប្រទេសដែលដាក់ទណ្ឌកម្មថាបានជំរុញចលនាប្រឆាំងនឹងជនជាតិជ្វីហ្វទៅវិញ៕