(កៀវ)៖ មន្ត្រីនៃប្រទេសទាំងពីរបានប្រកាសកាលពីថ្ងៃពុធថា ប្រទេសរុស្ស៊ី និងអ៊ុយក្រែន បានធ្វើការផ្លាស់ប្តូរឈ្លើយសឹកសង្គ្រាម (POW) ចំនួន ១០៣នាក់រៀងៗខ្លួន ខណៈដែលចារកម្មអ៊ុយក្រែនបានបង្ហើបថា នឹងមានការដោះដូរមួយលើកទៀតនៅមុនដំណាច់ខែនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ទីក្រុងកៀវ និងទីក្រុងមូស្គូតែងតែធ្វើការផ្លាស់ប្តូរឈ្លើយសឹកជាប្រចាំ ចាប់តាំងពីសង្គ្រាមឈ្លានពានរបស់រុស្ស៊ីបានផ្ទុះឡើងក្នុងឆ្នាំ២០២២ បើទោះបីជាភាគីទាំងពីរនៅតែមានភាពខ្វែងគំនិតគ្នាយ៉ាងខ្លាំង ជុំវិញលក្ខខណ្ឌនៃកិច្ចព្រមព្រៀងសន្តិភាពក៏ដោយ។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី​ បានបញ្ជាក់ថា ឈ្លើយសឹកអ៊ុយក្រែនដែលបានវិលត្រឡប់មកផ្ទះវិញ រួមមានយោធិនមកពីកងយោធា​ កងឆ្មាំព្រំដែនរដ្ឋ និងកងឆ្មាំជាតិ។ ចំណែកឯភាគីរុស្ស៊ីវិញ ទីភ្នាក់ងារសារព័ត៌មាន Interfax ក៏បានដកស្រង់ការបញ្ជាក់ពីក្រសួងការពារជាតិរុស្ស៊ីជុំវិញការដោះដូរនេះផងដែរ។

លោក ឌីមីត្រូ (Dmytro) អាយុ ២៩ឆ្នាំ ដែលជាអតីតឈ្លើយសឹកអ៊ុយក្រែនរយៈពេល ៣ឆ្នាំ បានរៀបរាប់ទាំងក្តីរំភើបថា «វាជាថ្ងៃដ៏អស្ចារ្យបំផុតដែលខ្ញុំបានត្រឡប់មកផ្ទះវិញ។ ខ្ញុំចង់ផ្តាំទៅកាន់ក្រុមគ្រួសាររបស់អ្នកដែលកំពុងជាប់ឃុំថា សូមបន្តជឿជាក់ និងកុំបាត់បង់ក្តីសង្ឃឹមឱ្យសោះ»។ ចំណែកលោក អាន់តុន ទីម៉ូហ្វីអិនកូ (Anton Tymofienko) អាយុ ៤៣ឆ្នាំ ដែលជាប់ឃុំ ២៨ខែ បានរំលឹកថា ក្នុងពេលជាប់ឃុំ ពួកគេមិនទទួលបានព័ត៌មានអ្វីទាំងអស់ ក្រៅពីសំបុត្រពីសាច់ញាតិ។

ប្រធានចារកម្មយោធាអ៊ុយក្រែន លោក អូឡេ អ៊ីវ៉ាសឆេនកូ (Oleh Ivashchenko) បានបញ្ជាក់ថា ការដោះដូរលើកក្រោយនៅចុងខែនេះ នឹងផ្តោតលើការនាំយកយុទ្ធជនដែលជាប់ឃុំឃាំងរយៈពេលយូរ រួមទាំងអ្នកដែលបានចូលរួមការពារទីក្រុងកំពង់ផែ ម៉ារីយូប៉ូល (Mariupol) ដែលរុស្ស៊ីបានឡោមព័ទ្ធកាលពីដើមសង្គ្រាមផងដែរ៕