(សេអ៊ូល)៖ រដ្ឋមន្ត្រីការបរទេសចិន លោក វ៉ាង យី បាននិយាយនៅថ្ងៃពុធ ទី១៩ ខែសីហា ឆ្នាំ២០២៦ ថាទីក្រុងប៉េកាំងកំពុងពិចារណាលើការរៀបចំកិច្ចប្រជុំកំពូលរវាងមេដឹកនាំកូរ៉េខាងត្បូង និងចិន នៅឯកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ក្នុងទីក្រុង Shenzhen ប្រទេសចិន នៅខែវិច្ឆិកាខាងមុខ។ នេះតាមការបញ្ជាក់ពីក្រសួងការបរទេសកូរ៉េខាងត្បូង ដកស្រង់ចេញផ្សាយដោយទីភ្នាក់ងារសារព័ត៌មាន​ Reuters។

ក្នុងសេចក្ដីថ្លែងការណ៍មួយ ខាងក្រសួងការបរទេសកូរ៉េខាងត្បូង លោក វ៉ាង យី បានធ្វើការកត់សម្គាល់ខាងលើក្នុងកិច្ចប្រជុំជាមួយរដ្ឋមន្ត្រីការបរទេសកូរ៉េខាងត្បូង លោក Cho Hyun អំឡុងដំណើរទស្សនកិច្ចរបស់លោកទៅកាន់ទីក្រុងសេអ៊ូល។ តាមសេចក្ដីថ្លែងការណ៍ដដែល រដ្ឋមន្ត្រីការបរទេសនៃប្រទេសទាំង២ បានឯកភាពគ្នាលើការបន្តកិច្ចប្រឹងប្រែងដើម្បីពង្រីកការទំនាក់ទំនងរវាងប្រជាជន និងប្រជាជន។ លោក វ៉ាង និងលោក Cho ក៏បានព្រមព្រៀងគ្នាផងដែរលើកិច្ចសហប្រតិបត្តិការក្នុងវិស័យជាច្រើន ក្នុងនោះរួមមានកិច្ចចរចាដើម្បីវិស័យសេវាកម្ម និងការវិនិយោគ នៅក្រោមកិច្ចព្រមព្រៀងពាណិជ្ជកម្មសេរីចិន-កូរ៉េខាងត្បូង ស្ថិរភាពនៃខ្សែច្រវ៉ាក់ផ្គត់ផ្គង់ ការផ្លាស់ប្ដូរវប្បធម៌ រួមទាំងការទទួលចិញ្ចឹមសត្វខ្លាឃ្មុំផេនដា។

ជាមួយគ្នានោះដែរ លោក Cho បានជំរុញឱ្យចិនដើរតួនាទីប្រកបដោយលក្ខណៈស្ថាបនាដើម្បីបញ្ចុះបញ្ចូលឱ្យកូរ៉េខាងជើងត្រឡប់មករកតុចរចាឡើងវិញឱ្យបានឆាប់តាមដែលអាចធ្វើទៅបាន ខណៈ លោក វ៉ាង បានគូសបញ្ជាក់ថាចិននៅតែប្រកាន់គោលជំហរជាប់លាប់ក្នុងគោលនយោបាយរបស់ខ្លួនចំពោះឧបទ្វីបកូរ៉េ នោះគឺសង្ឃឹមថាកូរ៉េទាំង២អាចនឹងរួមរស់នៅជាមួយគ្នាដោយសន្តិភាព៕