(ញូវយ៉ក)៖ អ្នកនាំពាក្យអង្គការសហប្រជាជាតិ (UN) បាននិយាយកាលពីថ្ងៃពុធសប្តាហ៍នេះថា លោកអគ្គលេខាធិការ Antonio Guterres មានក្តីបារម្ភយ៉ាងខ្លាំងចំពោះការសម្រេចចិត្តរបស់សហរដ្ឋអាមេរិក ក្នុងការដាក់ទណ្ឌកម្មលើប្រធានតុលាការព្រហ្មទណ្ឌអន្តរជាតិ (ICC) លោកស្រី Tomoko Akane និងមេធាវីជាន់ខ្ពស់ លោក Abdoulaye Seye។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី២០ ខែសីហា ឆ្នាំ២០២៦។

រដ្ឋមន្ត្រីការបរទេសអាមេរិក លោក Marco Rubio បានប្រកាសដាក់ចេញនូវទណ្ឌកម្មនេះកាលពីថ្ងៃអង្គារ។ ក្នុងសន្និសីទសារព័ត៌មានប្រចាំថ្ងៃនៅទីក្រុងញូវយ៉ក អ្នកនាំពាក្យ UN លោក Stephane Dujarric បានលើកឡើងដូច្នេះថា «អគ្គលេខាធិការ UN បារម្ភខ្លាំងណាស់ពីទណ្ឌកម្មនេះ ក៏ដូចជាការបន្តកំណត់ឈ្មោះបុគ្គលិកផ្សេងទៀតរបស់តុលាការព្រហ្មទណ្ឌអន្តរជាតិ»។ លោក Dujarric បន្ថែមថាទោះបី UN និង ICC ជាស្ថាប័នដាច់ដោយឡែកពីគ្នា និងមានអាណត្តិខុសគ្នាក៏ដោយ ក៏ UN ចាត់ទុកតុលាការនេះថាជា «សសរស្តម្ភដ៏សំខាន់ក្នុងយុត្តិធម៌ផ្នែកព្រហ្មទណ្ឌសម្រាប់អន្តរជាតិ»។

គួរបញ្ជាក់ថា ICC ត្រូវបានបង្កើតឡើងដោយសហគមន៍អន្តរជាតិ កាលពីឆ្នាំ២០០២ ដើម្បីកាត់ទោសឧក្រិដ្ឋកម្មសង្គ្រាម អំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ។ ទណ្ឌកម្មថ្មីគឺជាភាពតានតឹងចុងក្រោយបង្អស់ក្នុងយុទ្ធនាការរបស់រដ្ឋបាលលោក ត្រាំ ប្រឆាំងនឹងតុលាការដែលមានមូលដ្ឋាននៅទីក្រុងឡាអេមួយនេះ៕