(បាងកក)៖ មេបញ្ជាការកំពូលយោធាថៃ លោក Ukris Boontanondha បានស្វាគមន៍មេបញ្ជាការកំពូលយោធាមីយ៉ាន់ម៉ា លោក Ye Win Oo សម្រាប់ជំនួបពិភាក្សាថ្ងៃព្រហស្បតិ៍ ទី២០ ខែសីហា ឆ្នាំ២០២៦ នៅឯសណ្ឋាគារមួយក្នុងទីក្រុងបាងកក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

ជំនួបនេះត្រូវបានគេរំពឹងថា នឹងផ្តោតលើព្រំដែនប្រវែង ២ ៤០០គីឡូម៉ែត្រ រវាងប្រទេសទាំងពីរ ដែលជាតំបន់សង្គ្រាមស៉ីវិលនៅមីយ៉ាន់ម៉ា បានបង្កឱ្យមានអស្ថិរភាពយូរមកហើយ។ លោក Ye Win Oo ដែលធ្លាប់ជាប្រធានផ្នែកស៉ើបការណ៍សម្ងាត់នៃអតីតរបបសឹកមីយ៉ាន់ម៉ា កំពុងស្ថិតក្រោមការដាក់ទណ្ឌកម្មពីប្រទេសនានា រួមទាំងសហរដ្ឋអាមេរិក ដោយសារតួនាទីរបស់លោកនៅក្នុងរដ្ឋប្រហារឆ្នាំ២០២១។

ក្រុមអ្នកឃ្លាំមើលលទ្ធិប្រជាធិបតេយ្យ បានរិះគន់ចំៗថាការបោះឆ្នោតនៅមីយ៉ាន់ម៉ា គ្រាន់តែជារូបភាព នៃការប្តូររបៀបគ្រប់គ្រងដោយយោធាប៉ុណ្ណោះ ខណៈអតីតមេដឹកនាំរដ្ឋាភិបាលស៉ីវិល លោកស្រី Suu Kyi បន្តជាប់ឃុំខ្លួន ហើយគណបក្សនយោបាយរបស់លោកស្រី ត្រូវបានដកចេញពីឆាកនយោបាយ ព្រមទាំងមានការដាក់ទោស អ្នកមានមតិផ្ទុយឱ្យជាប់ពន្ធនាគារផងដែរ។ ប៉ុន្តែ ថៃដែលមានបញ្ហាព្រំដែនជាមួយមីយ៉ាន់ម៉ា បានឆ្លៀតយកឱកាស នៃការបោះឆ្នោតនេះ ដើម្បីចាប់ផ្តើមទំនាក់ទំនងឡើងវិញ។

នេះគឺជាទស្សនកិច្ចក្រៅប្រទេសលើកដំបូងសម្រាប់លោក Ye Win Oo ខណៈដែលកងកម្លាំងប្រដាប់អាវុធរបស់លោក ដែលធ្លាប់បានធ្វើរដ្ឋប្រហារទម្លាក់រដ្ឋាភិបាលស៉ីវិលមីយ៉ាន់ម៉ានោះ កំពុងព្យាយាមធ្វើឱ្យខ្លួនឯងរួចផុតពី ភាពឯកោលើឆាកអន្តរជាតិ។ លោកបានក្លាយជាប្រមុខយោធាមីយ៉ាន់ម៉ា កាលពីខែមីនា បន្តពីលោក Min Aung Hlaing ដែលបានឡើងទៅកាន់តំណែងជាប្រធានាធិបតីស៉ីវិល។ ពេលថ្មីៗនេះ លោក Min Aung Hlaing ទើបតែបាន​មកបំពេញ ទស្សនកិច្ចនៅទីក្រុងបាងកក ក្រោមការទទួលស្វាគមន៍ដោយកម្រាលព្រំក្រហមពីសំណាក់នាយករដ្ឋមន្រ្តីថៃ លោក Anutin Charnvirakul៕