(ស៉ីដនី)៖ អូស្រ្តាលី នាថ្ងៃព្រហស្បតិ៍ ទី២០ ខែសីហា ឆ្នាំ២០២៦ បានកោះហៅឯកអគ្គរដ្ឋទូតអ៉ីស្រាអែល មកសម្តែងការតវ៉ាចំពោះការសម្រេចចិត្តរបស់កងទ័ពអ៉ីស្រាអែល មិនចាត់វិធានការផ្លូវច្បាប់ ពាក់ព័ន្ធករណីបុគ្គលិកផ្តល់ជំនួយជនជាតិអូស្រ្តាលីម្នាក់បាត់បង់ជីវិត ក្នុងហេតុការណ៍វាយប្រហារលើតំបន់ហ្កាហ្សា កាលពីឆ្នាំ២០២៤។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

កងទ័ពអ៉ីស្រាអែល បាននិយាយកាលពីថ្ងៃពុធថា ក្រោយបញ្ចប់ដំណើរការស្វែងរកការពិត និងវាយតម្លៃ ខ្លួនរកមិនឃើញមូលដ្ឋានណាមួយ ដែលត្រូវស៉ើបអង្កេតលើករណីសម្លាប់បុគ្គលិកផ្តល់ជំនួយចំនួន ៧នាក់ មកពីអង្គការសប្បុរស World Central Kitchen រួមមានទាំងជនជាតិអូស្ត្រាលីម្នាក់ ឈ្មោះ Zomi Frankcom នោះទេ។

រដ្ឋមន្រ្តីការបរទេសអូស្រ្តាលី លោកស្រី Penny Wong គូសបញ្ជាក់ថា «ការសម្រេចនេះខុសឆ្ងាយពី ទំនួលខុសត្រូវដែលយើងរំពឹងទុក។ រដ្ឋាភិបាលអូស្ត្រាលីនឹងមិនឈប់ដាក់សម្ពាធលើអ៉ីស្រាអែល ដើម្បីស្វែងរកយុត្តិធម៌ជូន Zomi និងមិត្តរួមការងាររបស់នាងឡើយ»។ នៅក្នុងសេចក្តីថ្លែងការណ៍ លោកស្រី Wong បានឱ្យដឹងថា លោកស្រីបានណែនាំឯកអគ្គរដ្ឋទូតអូស្ត្រាលីប្រចាំអ៉ីស្រាអែល ឱ្យបញ្ជូនមតិយោបល់របស់អូស្ត្រាលី ទៅកាន់រដ្ឋាភិបាលអ៉ីស្រាអែលដោយផ្ទាល់ ខណៈកំពុងពិចារណាលើជំហានបន្ទាប់។

គួរបញ្ជាក់ថា ការវាយប្រហារបណ្តាលឱ្យស្លាប់បុគ្គលិកផ្តល់ជំនួយ កាលពីឆ្នាំ២០២៤នោះ បានរងនូវការថ្កោលទោសពីសហរដ្ឋអាមេរិក និងសម្ព័ន្ធមិត្ត បន្ទាប់ពីពលរដ្ឋមកពីចក្រភពអង់គ្លេស និងប៉ូឡូញ ព្រមទាំងជនជាតិប៉ាឡេស្ទីន និងបុគ្គលម្នាក់មានសញ្ជាតិអាមេរិក-កាណាដា ស្ថិតក្នុងចំណោមអ្នកស្លាប់៕