(សេអ៊ូល)៖ យោធាកូរ៉េខាងត្បូង បានរាយការណ៍ថា នាថ្ងៃព្រហស្បតិ៍ ទី២០ ខែសីហា ឆ្នាំ២០២៦ កូរ៉េខាងជើង បានបាញ់តេស្តមីស៉ីលយ៉ាងហោចចំនួន ១០គ្រាប់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

យោធាកូរ៉េខាងត្បូង បានឱ្យដឹងថា កូរ៉េខាងជើងបានបាញ់មីស៉ីលប្រភេទជាមីស៉ីលផ្លោងបាលិស្ទីគប្រហែល១០គ្រាប់ ចេញពីតំបន់រដ្ឋធានីព្យុងយ៉ាង ឆ្ពោះទៅកាន់ផ្ទៃសមុទ្រ។ ការបាញ់តេស្តមីស៉ីលថ្មីចុងក្រោយបង្អស់នេះ កើតមានឡើង ស្របពេលដែលការធ្វើសមយុទ្ធយោធាប្រចាំឆ្នាំរួមគ្នា ​របស់កូរ៉េខាងត្បូងនិងសហរដ្ឋអាមេរិក នឹងត្រូវប្តូរមកបិទបញ្ចប់ ត្រឹមថ្ងៃសុក្រសប្តាហ៍នេះ លឿនជាងកាលវិភាគដើម បន្ទាប់ពីប្រធានាធិបតីអាមេរិក លោក ដូណាល់ ត្រាំ បានចេញបញ្ជាឱ្យកាត់បន្ថយការចូលរួម របស់ទីក្រុងវ៉ាស៉ីនតោន។

គួរបញ្ជាក់ថា កាលពីថ្ងៃពុធ លោក ត្រាំ ថែមទាំងបង្ហើបថា រូបលោកមានគម្រោងជួបមេដឹកនាំកូរ៉េខាងជើង លោក គីម ជុងអ៊ុន នៅក្នុងឆ្នាំ២០២៦នេះ។ ទោះជាបែបនេះក្តី ក្នុងថ្ងៃដដែល ប្អូនស្រីលោក គីម គឺលោកស្រី Kim Yo Jong បានលើកឡើងថា គោលនយោបាយប្រកាន់អរិភាពរបស់អាមេរិកចំពោះ​កូរ៉េខាងជើង មិនបានផ្លាស់ប្តូរនោះឡើយ ដ្បិតការធ្វើសមយុទ្ធនៅតែបន្ត ទោះត្រូវបានកាត់បន្ថយ៕