(មូស្គូ)៖ វិមានក្រឹមឡាំងបានលើកឡើងថា មានការបែកបាក់យ៉ាងជ្រាលជ្រៅនៅក្នុងជួរថ្នាក់ដឹកនាំរបស់ប្រទេសអ៊ុយក្រែន ដែលនេះជាប្រតិកម្មដំបូងបំផុតចំពោះការអំពាវនាវរបស់អតីតរដ្ឋមន្ត្រីការពារជាតិអ៊ុយក្រែនដែលទើបត្រូវបានដកតំណែង ឱ្យរៀបចំការបោះឆ្នោតក្នុងអំឡុងពេលសង្គ្រាម។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២០ ខែសីហា ឆ្នាំ២០២៦។

អតីតរដ្ឋមន្ត្រីការពារជាតិអ៊ុយក្រែន លោក Mykhailo Fedorov បាននិយាយកាលពីថ្ងៃអង្គារថា ការបោះឆ្នោតគឺជារឿងចាំបាច់ ដោយសារតែទីក្រុងកៀវកំពុងប្រឈមមុខនឹង «វិបត្តិអភិបាលកិច្ចជាប្រព័ន្ធ» ពាក់ព័ន្ធនឹងបញ្ហាអំពើពុករលួយ ដែលនេះត្រូវបានចាត់ទុកថាជាការប្រឈមមុខផ្ទៃក្នុងដ៏ធំបំផុតចំពោះប្រធានាធិបតី លោក វ៉ូឡូឌីមៀ ហ្សេលេនស្គី ចាប់តាំងពីសង្គ្រាមទ្រង់ទ្រាយធំបានផ្ទុះឡើង។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថាលោកប្រធានាធិបតីរុស្ស៉ី វ្ល៉ាឌីមៀ ពូទីន ធ្លាប់បានលើកឡើងម្តងហើយម្តងទៀតអំពីភាពចាំបាច់នៃការរៀបចំការបោះឆ្នោតនៅអ៊ុយក្រែន ហើយប្រសិនបើគ្មានការបោះឆ្នោតទេនោះ លោក ហ្សេលេនស្គី គឺខ្វះភាពស្របច្បាប់ក្នុងការចរចាដោយផ្ទាល់ជាមួយរុស្ស៉ី។

លោក Peskov បានគូសបញ្ជាក់ដូច្នេះថា «របបដឹកនាំទីក្រុងកៀវ និងឆាកនយោបាយនៅទីនោះ គឺមានភាពរញ៉េរញ៉ៃយ៉ាងខ្លាំង។ យើងឃើញថាមនុស្សជាច្រើននៅទីនោះ កំពុងតែព្យាយាមឆ្លៀតឱកាសកេងចំណេញពីភាពវឹកវរនេះ... ប៉ុន្តែតាមផ្លូវច្បាប់ ស្ថានភាពគឺដូចគ្នាបេះបិទទៅនឹងអ្វីដែលលោកប្រធានាធិបតី ពូទីន ធ្លាប់បានលើកឡើង»។

គួរបញ្ជាក់ថា រដ្ឋាភិបាលអ៊ុយក្រែនតែងតែអះអាងជាយូរមកហើយថា ខ្លួនមិនអាចរៀបចំការបោះឆ្នោតបានឡើយ ស្របពេលដែលប្រទេសកំពុងស្ថិតនៅក្រោមច្បាប់អាជ្ញាសឹក និងត្រូវការពារបូរណភាពទឹកដីរបស់ខ្លួនប្រឆាំងនឹងការឈ្លានពានរបស់រុស្ស៉ី៕