(ប៉េកាំង)៖ ការនាំចេញសារធាតុរ៉ែកម្រ Yttrium របស់ចិនទៅកាន់សហរដ្ឋអាមេរិក បានកើនឡើងដល់ ២៩តោន នៅក្នុងខែកក្កដា ដែលជាកម្រិតខ្ពស់បំផុតលំដាប់ទីពីរ ចាប់តាំងពីទីក្រុងប៉េកាំងបានដាក់វិធានការរឹតត្បិតកាលពីឆ្នាំ២០២៥ ដោយបានជួយសម្រាលការលំបាកដល់វិស័យផលិតយន្តហោះអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការកើនឡើងនៃការផ្គត់ផ្គង់រ៉ែកម្រសម្រាប់ផលិតម៉ាស៊ីនយន្តហោះនេះ ធ្វើឡើងស្របពេលដែលប្រធានាធិបតីចិន លោក ស៊ី ជីនពីង ត្រៀមបំពេញទស្សនកិច្ចទៅកាន់សេតវិមាននៅខែកញ្ញាខាងមុខ។ ទោះជាយ៉ាងណា ការនាំចេញរ៉ែយុទ្ធសាស្ត្ររបស់ចិនទៅកាន់ប្រទេសជប៉ុន នៅតែបន្តរងការរឹតបន្តឹងយ៉ាងតឹងរ៉ឹង ដោយសារតែភាពតានតឹងផ្នែកការទូតជុំវិញបញ្ហាកោះតៃវ៉ាន់។

គួរបញ្ជាក់ថា ប្រទេសចិនគឺជាប្រភពផ្គត់ផ្គង់រ៉ែកម្រធំបំផុតនៅលើពិភពលោក និងបានប្រើប្រាស់វិធានការគ្រប់គ្រងការនាំចេញរ៉ែយុទ្ធសាស្ត្រទាំងនេះ ជាឧបករណ៍ការទូតដ៏សំខាន់មួយក្នុងទំនាក់ទំនងអន្តរជាតិ៕