(ប៉េកាំង)៖ ប្រព័ន្ធផ្សព្វផ្សាយរដ្ឋចិន បានរាយការណ៍ថា ចំនួនអ្នកស្លាប់ដោយសារទឹកជំនន់ដ៏មហន្តរាយ នៅភាគខាងត្បូងប្រទេសចិន កាលពីខែមុន បានកើនឡើងដល់ ១៥៩នាក់ កាលពីថ្ងៃសុក្រ ទី២០ ខែសីហា ឆ្នាំ២០២៦ ខណៈមានមនុស្ស ១០នាក់ទៀតនៅតែបន្តបាត់ខ្លួន។ នេះបើតាមការចេញផ្សាយដោយ​ ទីភ្នាក់ងារព័ត៌មាន AFP។

ព្យុះទីហ្វុងឈ្មោះថា Maysak បានបង្កការបំផ្លិចបំផ្លាញនៅពាសពេញផ្នែកមួយចំនួន នៃភាគខាងត្បូងប្រទេសចិន កាលពីខែកក្កដា ដោយនាំមកនូវភ្លៀងធ្លាក់ខ្លាំងក្លា និងទឹកជំនន់ធ្ងន់ធ្ងរ ដល់ខេត្ត Guangxi។ កាលពីពេលនោះ ប្រព័ន្ធផ្សព្វផ្សាយរដ្ឋ បានរាយការណ៍ថា មនុស្ស៣៩នាក់បានស្លាប់។

ទោះជាយ៉ាងណា ឥឡូវទូរទស្សន៍រដ្ឋ CCTV បានរាយការណ៍ថា គិតត្រឹមថ្ងៃសុក្រសប្តាហ៍នេះ គ្រោះមហន្តរាយខាងលើ បានបណ្តាលឱ្យមនុស្សសរុបកើនដល់ ១៥៩នាក់ស្លាប់ និង ១០នាក់នៅបន្តបាត់ខ្លួន។ CCTV មិនបានផ្តល់ព័ត៌មានលម្អិត អំពីមូលហេតុអ្វីបានជាតួលេខអ្នកស្លាប់ថ្មីនេះ ទើបតែត្រូវបានប្រកាសនៅ៦សប្តាហ៍ បន្ទាប់ពីទឹកជំនន់បានកើតឡើង នោះទេ។

ទូរទស្សន៍ CCTV បានបន្ថែមថា តាមដំណឹងដែលអ្នកព័ត៌មានយកបានពីកិច្ចប្រជុំដាច់ដោយឡែក ធ្វើឡើងនៅទីក្រុង Nanning និង Guigang នៃខេត្ត Guangxi ស្តីពីកិច្ចការងារស្តារ និងកសាងឡើងវិញក្រោយការវាយប្រហារព្យុះទីហ្វុង Maysak គឺគ្រោះមហន្តរាយនេះ បានជះផលប៉ះពាល់ដល់មនុស្សជាង ១,៦៥លាននាក់ នៅទូទាំងទីក្រុងទាំងពីរ ប៉ុន្តែនាពេលនេះ តំបន់ទាំងពីរ បានចូលដល់ដំណាក់កាលស្តារនិងកសាងឡើងវិញក្រោយគ្រោះមហន្តរាយ ពេញលេញហើយ។

គួរបញ្ជាក់ថា ក្នុងចំណោមតួលេខអ្នកស្លាប់កាលពីខែកក្កដា គឺ២៦នាក់ ទាក់ទងនឹងហេតុការណ៍បាក់ទំនប់នៅអាងស្តុកទឹក Liulan ក្នុងខេត្ត Guangxi៕