(មូស្គូ)៖ អនុរដ្ឋមន្ត្រីការបរទេសរុស្ស៊ី លោក Sergei Ryabkov បាននិយាយនៅថ្ងៃសុក្រ ទី២១ ខែសីហា ឆ្នាំ២០២៦ ថារុស្ស៊ីបើកទ្វារចំហដើម្បីទទួលស្តាប់សំណើថ្មីៗ ស្តីពីវិធីស្វែងរកដំណោះស្រាយសម្រាប់ជម្លោះនៅអ៊ុយក្រែន ប៉ុន្តែសំណើទាំងនោះត្រូវតែឆ្លុះបញ្ចាំងពីស្ថានការណ៍ជាក់ស្តែងនៅលើសមរភូមិ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Ryabkov បាននិយាយក្នុងបទសម្ភាសមួយ ជាមួយសារព័ត៌មាន News.ru ដែលចេញផ្សាយនៅថ្ងៃសុក្រនេះថា សហរដ្ឋអាមេរិកបានបង្ហាញពីឆន្ទៈ ក្នុងការធ្វើកិច្ចសន្ទនាប្រកបដោយភាពស្ថាបនា និងមានការយល់ដឹងអំពីជំហររបស់រុស្ស៊ី។ លោកបានបន្តថា នៅដំណាក់កាលនេះ អ្វីដែលកាន់តែសំខាន់នោះ គឺតើទីក្រុងវ៉ាស៊ីនតោន អាចមានឥទ្ធិពលកម្រិតណាលើ ការសម្រេចចិត្តរបស់រដ្ឋាភិបាលទីក្រុងកៀវ និងបណ្តាប្រទេសអឺរ៉ុបគាំទ្រអ៊ុយក្រែន ដែលនៅតែស្រមើសម្រៃចង់ឃើញរុស្ស៊ី ទទួលបរាជ័យជាយុទ្ធសាស្ត្រ។

គួរបញ្ជាក់ថា ស្របពេលដែលការប្រយុទ្ធគ្នានៅតាមសមរភូមិមុខ ស្ទើរតែជាប់គាំងទាំងស្រុង ហើយកិច្ចប្រឹងប្រែងចរចាក៏ត្រូវបានផ្អាក អ៊ុយក្រែននិងរុស្ស៊ីប៉ុន្មានខែមកនេះ បានបង្កើនការវាយប្រហាររយៈចម្ងាយឆ្ងាយយ៉ាងខ្លាំងដាក់គ្នា ដែលធ្វើឲ្យចំនួនជនស៊ីវិលបាត់បង់ជីវិតកើនឡើងខ្ពស់បំផុត គិតចាប់តាំងពីប៉ុន្មានខែដំបូងនៃសង្រ្គាម កាលពីក្នុងឆ្នាំ២០២២៕