(សេអ៊ូល)៖ ការិយាល័យប្រធានាធិបតីកូរ៉េខាងត្បូង នៅថ្ងៃសុក្រ ទី២១​ ខែសីហា ឆ្នាំ២០២៦ បានអំពាវនាវឱ្យកូរ៉េខាងជើងបញ្ឈប់ «ការប្រមាថរិះគន់ដែលមិនចាំបាច់» និងរួមគ្នាឆ្ពោះទៅមុខ ដើម្បីស្វែងរកសន្តិភាពពេញលេញ នៅឧបទ្វីបកូរ៉េ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការលើកឡើងដូចខាងលើនេះ គឺជាការឆ្លើយតបទៅនឹងសម្តីរបស់លោកស្រី Kim Yo Jong ដែលជាប្អូនស្រីដ៏មានឥទ្ធិពល​របស់មេដឹកនាំកូរ៉េខាងជើង លោក គីម ជុងអ៊ុន។ កាលពីព្រហស្បតិ៍សប្តាហ៍នេះ លោកស្រីបានរិះគន់ប្រធានាធិបតីកូរ៉េខាងត្បូង លោក Lee Jae Myung ចំពោះអ្វីដែលលោកស្រីហៅថា សម្តីមុខពីរដែលគ្មានភាពស្មោះត្រង់ ទាក់ទងទៅនឹងការកាត់បន្ថយសមយុទ្ធយោធារវាងសហរដ្ឋអាមេរិក និងកូរ៉េខាងត្បូង។

កាលពីថ្ងៃពុធ លោក Lee បានលើកឡើងថា រូបលោកទទួលស្គាល់ ឆន្ទៈនិងកិច្ចខិតខំប្រឹងប្រែងរបស់ប្រធានាធិបតីអាមេរិក លោក ដូណាល់ ត្រាំ ក្នុងការបង្កើតលក្ខខណ្ឌ សម្រាប់កិច្ចសន្ទនាជាមួយកូរ៉េខាងជើង តាមរយៈការកាត់បន្ថយសមយុទ្ធយោធា។ លោក Lee បាននិយាយដូច្នេះថា «សាររបស់លោកប្រធានាធិបតី ត្រាំ លើកនេះ ហាក់ដូចជាការសម្រេចចិត្តដ៏សំខាន់មួយ ដែលត្រូវបានពិចារណាយ៉ាងប្រុងប្រយ័ត្ន ដើម្បីបង្កើតសន្តិភាពនៅឧបទ្វីបកូរ៉េ ដោយបោះជំហានទៅមុខហួសពីភាពជាសត្រូវ និងការប្រឈមមុខដាក់គ្នា»។

គួរបញ្ជាក់ថា សមយុទ្ធយោធាប្រចាំឆ្នាំរវាងកូរ៉េខាងត្បូងនិងអាមេរិក ត្រូវបិទបញ្ចប់មុនកាលកំណត់ នៅថ្ងៃសុក្រនេះ បន្ទាប់ពីលោក ត្រាំ បានបញ្ជាឱ្យកាត់បន្ថយយ៉ាងច្រើន នូវការចូលរួមរបស់កងទ័ពអាមេរិក ហើយលោកបានបន្ថែមថា លោកចង់ស្តារកិច្ចការទូតឡើងវិញជាមួយលោក គីម ជុងអ៊ុន។

កាលពីថ្ងៃចន្ទដើមសប្តាហ៍នេះ លោក ត្រាំ បាននិយាយថា លោកទទួលបានការឆ្លើយតបពីមេដឹកនាំកូរ៉េខាងជើង បន្ទាប់ពីការកាត់បន្ថយសមយុទ្ធជាមួយកូរ៉េខាងត្បូង។ ប៉ុន្តែលោកស្រី Kim Yo Jong បាននិយាយកាលពីថ្ងៃពុធថា លោកស្រី មិនបានដឹងអំពីការទំនាក់ទំនងថ្មីៗណាមួយ រវាងបងប្រុសលោកស្រី និងលោក ត្រាំ ឡើយ។ លោកស្រី ក៏បានលើកឡើងដែរថា គោលនយោបាយប្រកាន់អរិភាពរបស់សហរដ្ឋអាមេរិកចំពោះទីក្រុងព្យុងយ៉ាង គឺមិនបានផ្លាស់ប្តូរអ្វីនោះទេ ដ្បិតសមយុទ្ធយោធារួម​នៅតែត្រូវបានប្រព្រឹត្តទៅ ទោះបីកាត់បន្ថយក៏ដោយ៕