(ភ្នំពេញ)៖ កិច្ចសហប្រតិបត្តិការមេគង្គ-ឡានឆាង មិនត្រឹមតែកម្រិតត្រឹមក្របខ័ណ្ឌអន្តររដ្ឋាភិបាលប៉ុណ្ណោះទេ ប៉ុន្តែត្រូវបានជំរុញឱ្យក្លាយជា លទ្ធផលជាក់ស្តែង ដើម្បីលើកកម្ពស់ជីវភាពរស់នៅរបស់ប្រជាជនតាមដងទន្លេ។ នេះបើយោងតាម ការលើកឡើងរបស់ លោកបណ្ឌិត ជា មូនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន ក្នុងបទសម្ភាសន៍ជាមួយ អ្នកសារព័ត៌មានវិទ្យុមិត្តភាពកម្ពុជាចិន នារសៀលថ្ងៃទី២០ ខែសីហា ឆ្នាំ២០២៦។

ផ្អែកលើកិច្ចសហប្រតិបត្តិការទ្វេភាគីរវាងកម្ពុជា និងចិន លោកបណ្ឌិត បានគូសបញ្ជាក់ពីចំណុចសំខាន់ៗចំនួន ៤ រួមមាន៖ ទី១ ភាគីទាំងពីរមានការប្តេជ្ញាចិត្តយ៉ាងមុតមាំ ក្នុងការរួមគ្នាពង្រឹងក្របខ័ណ្ឌមេគង្គ-ឡានឆាង និងធានាថាគ្រប់គម្រោងទាំងអស់ ផ្តល់ផលប្រយោជន៍ពិតប្រាកដដល់សង្គម។ ទី២ មូលនិធិពិសេសមេគង្គ-ឡានឆាង បានដើរតួនាទីយ៉ាងសំខាន់ និងស័ក្តិសិទ្ធិភាពក្នុងការគាំទ្រគម្រោងអភិវឌ្ឍន៍នានានៅកម្ពុជា ផ្តោតលើវិស័យ សុខាភិបាល អប់រំ និងការអភិវឌ្ឍសហគ្រិនភាព សម្រាប់ យុវជន និងស្ត្រី។ ទី៣ ភាគីចិនបានចុះពិនិត្យផ្ទាល់ដល់ទីតាំងគម្រោងដែលផ្តួចផ្តើមដោយកម្ពុជា ដើម្បីស្វែងយល់ពីលទ្ធផលពិតប្រាកដ ក៏ដូចជារកដំណោះស្រាយចំពោះបញ្ហាប្រឈមផ្សេងៗ និងទី៤ គុណតម្លៃ នៃកិច្ចសហប្រតិបត្តិការនេះ គឺមិនអាចវាស់វែងត្រឹមចំនួនទឹកប្រាក់ ឬបរិមាណគម្រោងនោះទេ ប៉ុន្តែវាស់វែងតាមរយៈ ជីវភាពរស់នៅកាន់តែប្រសើរ របស់ប្រជាជនដែលជាអ្នកទទួលផលផ្ទាល់។

សូមបញ្ជាក់ថា គំនិតផ្តួចផ្តើម និងកិច្ចសហប្រតិបត្តិការក្នុងក្របខ័ណ្ឌនេះ បាននិងកំពុងបង្ហាញឱ្យឃើញពី ភាពជាដៃគូរយុទ្ធសាស្ត្រគ្រប់ជ្រុងជ្រោយ ដែលនាំមកនូវផលជារូបិយ និងអរូបិយដល់ការអភិវឌ្ឍសង្គម-សេដ្ឋកិច្ចកម្ពុជា៕

វិទ្យុមិត្តភាពកម្ពុជាចិន