(វ៉ាស៊ីនតោន)៖ សហរដ្ឋអាមេរិក និងអ៉ីរ៉ង់បានបោះពាក្យគំរាមគ្នាទៅវិញទៅមក នៅមុនការប្រកាសពីការដាក់ទណ្ឌកម្មសេដ្ឋកិច្ចថ្មីមួយរបស់សហរដ្ឋអាមេរិក ដែលគ្រោងនឹងធ្វើឡើងនៅថ្ងៃចន្ទដើមសប្ដាហ៍ក្រោយនេះ ហើយអាចនឹងបង្កផលប៉ះពាល់ដល់អ៉ីរ៉ង់ និងដៃគូពាណិជ្ជកម្មសំខាន់ៗរបស់តេហេរ៉ង់ក្នុងនោះរួមមានទាំងចិន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។​

ខណៈសង្រ្គាមឈានជិតដល់ខែទី៦ សហរដ្ឋអាមេរិក និងអ៉ីរ៉ង់មិនបានបាញ់បោះអាវុធដាក់គ្នានោះទេ ហើយក៏មិនបានបន្តកិច្ចចរចាសន្តិភាពនោះដែរ។ ប៉ុន្តែបែរជាបង្កើនវោហាសាស្ត្រសម្លុតគំរាមដាក់គ្នា។ រដ្ឋមន្ត្រីហិរញ្ញវត្ថុអាមេរិក លោក Scott Bessent នឹងធ្វើសន្និសីទសារព័ត៌មាននៅម៉ោង ២រសៀល នៅថ្ងៃចន្ទសប្ដាហ៍ក្រោយ (ម៉ោងនៅសហរដ្ឋអាមេរិក) បន្ទាប់ពីរូបលោកបានសន្យាថានឹងដាក់ទណ្ឌកម្មធ្ងន់ធ្ងរបំផុតមិនធ្លាប់មាននៅក្នុងប្រវត្តិសាស្ត្រប្រឆាំងនឹងអ៉ីរ៉ង់ ស្របពេលជំរុញឱ្យចិនធ្វើកិច្ចសហប្រតិបត្តិការជាមួយទីក្រុងវ៉ាស៊ីនតោន។ ចិនគឺជាដៃគូពាណិជ្ជកម្មដ៏ធំបំផុតរបស់អ៉ីរ៉ង់ និងដែលទិញ ៩០ភាគរយនៃប្រេងដែលអ៉ីរ៉ង់នាំចេញ។

អ្នកនាំពាក្យក្រសួងការបរទេសអ៉ីរ៉ង់ លោក Esmaeil Baghaei នៅថ្ងៃសៅរ៍ ទី២២ ខែសីហា ឆ្នាំ២០២៦ បាននិយាយថាការប្រកាសនូវទណ្ឌកម្មថ្មីរបស់សហរដ្ឋអាមេរិកគឺជាទង្វើរំលោភបំពានលើអធិបតេយ្យរបស់អ៉ីរ៉ង់ដែលជាសមាជិកអង្គការសហប្រជាជាតិ ហើយទណ្ឌកម្មបន្ទាប់បន្សំរបៀបនេះមិនមានមូលដ្ឋានច្បាប់អន្តរជាតិអ្វីទាំងអស់។ លោក ត្រាំ​ដែលបានព្រមានពីផលវិបាកសេដ្ឋកិច្ច ប្រឆាំងនឹងប្រទេសណាមួយដែលជួយ ឬធ្វើពាណិជ្ជកម្មជាមួយអ៉ីរ៉ង់បានកត់សម្គាល់កាលពីថ្ងៃសុក្រថាទីក្រុងវ៉ាស៊ីនតោនកំពុងតាមដានអ្វីដែលកំពុងកើតឡើងក្នុងសង្រ្គាមអ៉ីរ៉ង់ និងថាអ៉ីរ៉ង់មិនទាន់ត្រៀមខ្លួនរួចរាល់ដើម្បីចុះកិច្ចព្រមព្រៀងដ៏ល្អមួយនោះទេ។

ព្រមពេលជាមួយគ្នា ប្រមុខកងកម្លាំងប្រដាប់អាវុធអ៉ីរ៉ង់ លោកឧត្តមសេនីយ៍ លោក ​Ali Abdollahi បានព្រមានថាអ៉ីរ៉ង់នឹងប្រើប្រាស់ជម្រើសយោធាដើម្បីឆ្លើយតបទៅនឹងការគំរាមកំហែងពីសត្រូវដោយចង់សំដៅលើការដាក់ទណ្ឌកម្មរបស់សហរដ្ឋអាមេរិក។

តែទោះយ៉ាងណាក៏ដោយ ប្រធានាធិបតីអ៉ីរ៉ង់ លោក Masoud Pezeshkian នៅតែអំពាវនាវឱ្យមានដំណោះស្រាយតាមផ្លូវការទូច ដូចគ្នាទៅនឹងទីក្រុងប៉េកាំងដែរ៕