(ហ៊្សេរុយសាឡិម)៖ អ៉ីស្រាអែលល​ បាន​បើកការ​វាយប្រហារ​ថ្មី​មួយទៀត​នៅប្រទេស​ស៉ីរី កាលពី​ថ្ងៃ​សៅរ៍ ទី២២ ខែសីហា ឆ្នាំ២០២៦ និង​បាន​ថ្កោលទោស​​បេសកជន​របស់សហរដ្ឋអាមេរិក​លោក Tom Barrack ចំពោះ​ការរិះគន់ការវាយប្រហារក្នុងសប្តាហ៍នេះ ​លើ​មូលដ្ឋាន​ទ័ពអាកាស​មួយ​នៅ​ភាគ​ពាយ័ព្យស៉ីរី ដែលអ៉ីស្រាអែល​បាន​ចោទប្រកាន់​តួកគីយ៉េ​ថា ​កំពុងព្យាយាម​ស្វែងរកសិទ្ធិប្រើប្រាស់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

បេសកជន​អាមេរិក​ប្រចាំ​ស៉ីរី​លោក Tom Barrack កាលពី​ថ្ងៃ​អង្គារ​សប្តាហ៍នេះ បាន​រិះគន់ការវាយប្រហារ​របស់​អ៉ីស្រាអែល​លើ​មូលដ្ឋាន​ទ័ពអាកាស​យោធា​ ដែល​លែងមានការប្រើប្រាស់​នោះ​ថា​ជា «ការបង្កើនភាពតានតឹង​មិន​ចាំបាច់ ​ដែល​មិនជួយដល់ស្ថិរភាព​ក្នុង​តំបន់»។ រីឯក្នុងកិច្ចសម្ភាសមួយ កាលពីថ្ងៃសុក្រ លោក Barrack បាន​និយាយ​ថា ការវាយប្រហារ​នោះ អាច​មាន​បំណងដើម្បី​បង្ក​ជម្លោះ​ជាមួយ​តួកគីយ៉េ។ ប្រការនេះនាំ​ឱ្យ​រដ្ឋមន្ត្រី​ការពារជាតិអ៉ីស្រាអែល​ លោក Israel Katz ចេញមុខនិយាយបកទៅ​វិញ កាលពី​ថ្ងៃ​សៅរ៍ ដោយ​ហៅ​ការ​លើកឡើង​នោះ​ថា «ពោរពេញ​ដោយ​ភាព​មិន​ត្រឹមត្រូវ»។

លោក Katz បាន​សរសេរ​លើបណ្តាញសង្គមថា អ៉ីស្រាអែល​បាន​បញ្ជូនព័ត៌មាន​ស៊ើបការណ៍​ទៅ​កាន់ភាគី​​ដែលមានសិទ្ធិអនុញ្ញាត នៅ​សហរដ្ឋអាមេរិក មុនការវាយប្រហារ​កាលពី​ថ្ងៃ​អង្គារ។ លោក​បាន​បន្ថែម​ថា ការ​លើកឡើង​របស់​លោក Barrack «ពោរពេញ​ដោយ​ភាព​មិន​ត្រឹមត្រូវ និងផ្ទុយ​ពី​ជំហរ​របស់​ប្រធានាធិបតី​អាមេរិក លោក ដូណាល់ ត្រាំ ផ្ទាល់ ​ទាក់ទង​នឹង​តំបន់ Golan Heights បន្ទាប់ពី​លោកបេសកជនអាមេរិក បាន​ហៅ​ទឹកដី​នេះ​ថា «ទឹកដីស្ថិតក្រោមការត្រួតត្រា»។

ចាប់តាំងពី​ការ​ផ្ដួលរំលំ​អតីតមេដឹកនាំស៉ីរី​ដែល​កាន់អំណាច​យូរឆ្នាំ គឺលោក Bashar al-Assad កាលពី​ខែ​ធ្នូ ឆ្នាំ​២០២៤ អ៉ីស្រាអែល​បាន​ធ្វើការ​វាយប្រហារ​រាប់រយ​លើក​នៅប្រទេស​ស៊ីរី និង​ថែមទាំងបាន​បញ្ជូន​កងទ័ព​ចូល​ទៅក្នុង​តំបន់​ទ្រនាប់ ដែលល្បាតដោយ​​អង្គការសហប្រជាជាតិ​ ខណៈកន្លែងនោះបានបម្រើជាខ្សែបន្ទាត់ខណ្ឌចែកអស់រយៈពេលជាច្រើនទសវត្សរ៍ ​​រវាងកងកម្លាំង​អ៉ីស្រាអែលនិង​ស៊ីរី​ នៅ​តំបន់ Golan Heights។

គួរបញ្ជាក់ថា អ៉ីស្រាអែល​បាន​ដណ្ដើមកាន់កាប់ភាគច្រើន​នៃ​តំបន់ Golan Heights ពីប្រទេស​ស៉ីរី ​កាលពីអំឡុង​សង្គ្រាម​អារ៉ាប់-អ៉ីស្រាអែល​ឆ្នាំ​១៩៦៧ ហើយ​ក្រោយមក​បានកាត់​បញ្ចូល​តំបន់នេះ ​ក្រោម​ការគ្រប់គ្រង​របស់​ខ្លួន ជា​ទង្វើ​ដែល​ទទួលស្គាល់​ដោយ​សហរដ្ឋអាមេរិក ហើយក្នុង​ខែ​នេះ​ ក៏ត្រូវបានទទួលស្គាល់​​ដោយ​ប្រទេស​កូឡុំប៊ី​ផង​ដែរ។ នាយករដ្ឋមន្ត្រី​អ៉ីស្រាអែល​លោក Benjamin Netanyahu ដោយ​អត្ថាធិប្បាយ​លើ​ការវាយប្រហារ​កាលពី​ថ្ងៃ​អង្គារ បាន​ចោទថា តួកគីយ៉េ ដែល​ជា​សម្ព័ន្ធមិត្ត​របស់​អាជ្ញាធរ​ថ្មី​នៅ​ទីក្រុង​ដាម៉ាស កំពុង​ស្វែងរក​ការបង្កើត​វត្តមាន​យោធា​នៅ​មូលដ្ឋាន​ទ័ពអាកាសខាងលើ ប៉ុន្តែទីក្រុងអង់ការ៉ាបានបដិសេធ។ លោក Netanyahu និង​ប្រធានាធិបតី​តួកគីយ៉េ​លោក Recep Tayyip Erdogan បានផ្ទុះសង្រ្គាមពាក្យសម្តីនឹងគ្នា ចាប់តាំងពីការវាយប្រហារនោះ៕