(បាងកក)៖ អាជ្ញាធរថៃ បានអំពាវនាវដល់ប្រជាពលរដ្ឋទូទាំងខេត្តព្រំដែនភាគខាងត្បូងទាំងបីរបស់ប្រទេសថៃ ឱ្យស្នាក់នៅក្នុងផ្ទះកុំចេញទៅក្រៅបើមិនចាំបាច់ និងចៀសវាងទៅកាន់តំបន់ដែលរងផលប៉ះពាល់ បន្ទាប់ពីមានឧប្បត្តិហេតុវាយប្រហារជាច្រើនករណីកើនឡើងព្រមគ្នា កាលពីវេលាយប់ថ្ងៃទី ២២ ខែសីហា ឆ្នាំ២០២៦។ នេះបើតាមការចេញផ្សាយដោយ សារព័ត៌មាន Khaosod។

ហេតុការណ៍វាយប្រហារ៥១ករណី រួមមានចាប់តាំងពីការដុតបំផ្លាញ ការបំផ្ទុះគ្រាប់បែក និងការប្លន់ប្រដាប់អាវុធ ត្រូវបានរាយការណ៍យ៉ាងព្រោងព្រាត គិតត្រឹមយប់ពាក់កណ្តាលអធ្រាត្រ ចន្លោះថ្ងៃសៅរ៍និងថ្ងៃអាទិត្យ ក្នុងនោះ ២២ករណីនៅខេត្ត Narathiwat, ១១ករណីនៅខេត្ត Pattani និង ១៨ ករណីនៅខេត្ត Yala។ ជនស៊ីវិលពីរនាក់ ពីដំបូងត្រូវបានរាយការណ៍ថារងរបួសនៅ Narathiwat ខណៈមិនមានអ្នករងរបួសត្រូវបានរាយការណ៍ទេ នៅ Pattani និង Yala។ ដោយឡែក មកដល់ថ្ងៃអាទិត្យនេះ មានសេចក្តីរាយការណ៍ ពីហេតុការណ៍ផ្ទុះថ្មីមួយទៀត នៅទីតាំងដដែលក្នុងឃុំមួយ នៃខេត្ត Narathiwat ហើយបង្គោលភ្លើងមួយកន្លែង ក៏បានរងការបំផ្ទុះផងដែរនៅឃុំមួយផ្សេងទៀត។ រដ្ឋាភិបាលថៃ បានអះអាងថា ខ្លួនកំពុងតាមដានស្ថានការណ៍យ៉ាងដិតដល់ ខណៈប្រតិបត្តិការសន្តិសុខ នៅតែបន្តទូទាំងតំបន់ទាំងនោះ។

អាជ្ញាធរបានបង្កើនការការពារសន្តិសុខដល់កម្រិតខ្ពស់បំផុត នៅទូទាំងខេត្ត Narathiwat, Pattani និង Yala ខណៈកងកម្លាំងសន្តិសុខ កំពុងស្វែងរកក្រុមជនទទួលខុសត្រូវ។ ប្រជាពលរដ្ឋថៃ ក៏ត្រូវបានព្រមានមិនឱ្យចូលទៅជិត ទាក់ទង ឬប៉ះពាល់ជាមួយមនុស្ស វត្ថុ ឬយានយន្តគួរឱ្យសង្ស័យឡើយ ហើយត្រូវជូនដំណឹងដល់អាជ្ញាធរភ្លាមៗ ប្រសិនបើពួកគេជួបប្រទះអ្វីដែលមិនធម្មតា។

ព្រឹកថ្ងៃអាទិត្យនេះ នាយករដ្ឋមន្ត្រីថៃ លោក Anutin Charnvirakul បានកោះប្រជុំសន្តិសុខ ដើម្បីតាមដានការផ្ទុះឡើងភាពចលាចល ទូទាំងខេត្តព្រំដែនភាគខាងត្បូងទាំងបី កាលពីយប់ថ្ងៃទី២២ ខែសីហា មុនត្រូវធ្វើដំណើរទៅកាន់ខេត្ត Nan នៅឯភាគខាងជើងប្រទេស ដើម្បីត្រួតពិនិត្យកិច្ចប្រឹងប្រែងឆ្លើយតបគ្រោះទឹកជំនន់។

គួរបញ្ជាក់ថា តំបន់ព្រំដែនភាគខាងត្បូងរបស់ប្រទេសថៃ ដែលជាប់ព្រំប្រទល់ជាមួយប្រទេសម៉ាឡេស៊ី គឺជាទីកន្លែងនៃជម្លោះបះបោររ៉ាំរ៉ៃជាច្រើនទសវត្សរ៍មកហើយ ដោយកងកម្លាំងសន្តិសុខថៃ បានប្រយុទ្ធជាមួយក្រុមឧទ្ទាម ដែលព្យាយាមផ្តាច់ខ្លួនស្វែងរកឯករាជ្យ សម្រាប់បណ្តាខេត្តដែលមានប្រជាជនម៉ូស្លីម និងជនជាតិម៉ាឡេភាគច្រើន ដូចជានៅ Narathiwat, Pattani, Yala និងផ្នែកខ្លះនៃខេត្ត Songkhla។

តំបន់នេះធ្លាប់ជាផ្នែកនៃរដ្ឋស៊ូលតង់ម៉ាឡេឯករាជ្យមួយហៅថា Patani មុនពេលត្រូវបានក្រសោបយកដោយអាណាចក្រសៀម ក្រោមសន្ធិសញ្ញាឆ្នាំ១៩០៩ ជាមួយព្រីតថេន (ចក្រភពអង់គ្លេស)។ ដំណាក់កាលថ្មីចុងក្រោយបង្អស់នៃជម្លោះ បានផ្ទុះឡើងនៅឆ្នាំ២០០៤ និងបានឆក់យកជីវិតមនុស្សសរុបខ្ទង់ ៧៨០០នាក់ បើយោងតាមការឃ្លាំមើលជម្លោះរបស់អង្គការ Deep South Watch។ កាលពីខែកក្កដា បុគ្គលិកកងកម្លាំងសន្តិសុខថៃ៥នាក់ ត្រូវបានសម្លាប់ ក្នុងការវាយប្រហារមួយនៅខេត្ត Narathiwat៕