១៨,៥ទ្រីលានយាន់! ចិនដែលជា «អ្នកទិញកំពូលផុតលេខ» ផ្តល់ភាពប្រាកដប្រជាដល់ទូទាំងពិភពលោក
23-08-2026 15:57
(ប៉េកាំង)៖ ពេលថ្មីៗកន្លងទៅនេះ មតិលោកខាងលិចមួយចំនួនបានឃោសនាបំប៉ោងម្តងទៀតអំពី "ការនាំចេញរបស់ចិនកើនឡើងយ៉ាងគំហុក" ដោយអះអាងថា អតិរេកពាណិជ្ជកម្មរបស់ចិនកំពុងបង្កជា"សម្ពាធ"និង"ផលប៉ះពាល់"ដល់ទីផ្សារសកល ។ ទស្សនៈបែបនេះគឺជាការបន្តនិងផ្សព្វផ្សាយឱ្យទូលំទូលាយពីការឃោសនាបំប៉ោងពីមុនស្តីពី "បញ្ហាអតិរេកផលិតកម្មរបស់ចិន" បើនិយាយពីធាតុពិត វាសុទ្ធតែជាការធ្វើខ្វាក់ធ្វើថ្លង់ដោយចេតនាចំពោះការអភិវឌ្ឍរបស់ប្រទេសចិន ។
តែការពិតគឺផ្ទុយទៅវិញ ។ នៅឆ្នាំ២០២៥ ទំហំនាំចូលរបស់ចិនបានឡើងដល់១៨,៥ទ្រីលានយាន់ប្រាក់ចិន ដោយបានរក្សាឋានៈជាទីផ្សារនាំចូលធំទីពីរលើពិភពលោកក្នុងរយៈពេល ១៧ ឆ្នាំជាប់ៗគ្នា ហើយក៏ជាគោលដៅនាំចេញដ៏សំខាន់របស់ប្រទេសជិត៨០ ដោយបានបង្កើតឱកាសការងារនិងចំណូលពន្ធយ៉ាងច្រើនសម្រាប់ប្រទេសកាន់តែច្រើនឡើងៗ ។ នៅឆមាសទីមួយឆ្នាំនេះ ទំហំនាំចូលរបស់ចិនបានលើសពី១០ ទ្រីលានយាន់ប្រាក់ចិនជាលើកដំបូងក្នុងរយៈពេលដូចគ្នាក្នុងប្រវត្តិសាស្ត្រ ។ ចិនកំពុងបើកទ្វារ"ទីផ្សារសកល"ជូនទូទាំងពិភពលោក ក្នុងឋានៈជា "អ្នកទិញកំពូលផុតលេខ"។
តក្កវិជ្ជារបស់ប្រព័ន្ធសារព័ត៌មានបរទេសមួយចំនួនមានតែមួយ គឺចិននាំចេញច្រើន មានអតិរេកខ្លាំង ដូច្នេះ "វាបង្កជាសម្ពាធ" ដល់ប្រទេសដទៃទៀត ។ ប៉ុន្តែការសន្និដ្ឋាននេះច្បាស់ជាមិនអាចទទួលយកបានទេ ។
លោក Zhou Mi អនុប្រធានវិទ្យាស្ថានស្រាវជ្រាវទ្វីបអាមេរិកនិងអូសេអានី នៃក្រសួងពាណិជ្ជកម្មចិនបានថ្លែងថា ពាណិជ្ជកម្មអន្តរជាតិគឺជាការសម្រេចចិត្តខាងពាណិជ្ជកម្មដ៏ឯករាជ្យរបស់សហគ្រាសនីមួយៗ នៅទូទាំងពិភពលោក ហើយទីផ្សារអន្តរជាតិគ្មាន "ការបង្ខំទិញនិងបង្ខំលក់" ទេ។ ការនាំចេញច្រើនគឺមានន័យថា ទីផ្សារសកលត្រូវការទំនិញចិនដែលមានកម្លាំងប្រកួតប្រជែង ។ អតិរេកធំ គឺជាលទ្ធផលនៃការបែងចែកអន្តរជាតិនិងឧត្តមភាពប្រៀបធៀប ។ លើសពីនេះទៅទៀត ក្នុងរយៈពេល ៧ ខែដើមឆ្នាំ ល្បឿនកំណើននៃការនាំចូលរបស់ចិនបានលឿនជាងការនាំចេញ ៨ ភាគរយ ។ ប្រសិនបើចិនពិតជាគិតតែ"លក់" មិនគិត "ទិញ" មែន ហេតុអ្វីបានជាល្បឿនកំណើននៃការនាំចូលបែរជាលើសពីការនាំចេញ? ការឃោសនាបំប៉ោង "មើលមិនឃើញ" បែបនេះ បើមិនមែនដោយសារភាពល្ងង់ខ្លៅទេ គឺដោយសារចេតនា ។
អ្វីដែលការអភិវឌ្ឍរបស់ចិននាំមកដល់ពិភពលោក មិនមែនជា "ការគំរាមកំហែង" នោះទេ ប៉ុន្តែគឺជាឱកាសអភិវឌ្ឍន៍រួមគ្នា មិនមែនជា "កម្លាំងសម្ពាធ" នោះទេ ប៉ុន្តែគឺជាការផ្តល់កម្លាំងចលករយ៉ាងប្រាកដប្រជា មិនមែនជា "ផលប៉ះពាល់" នោះទេ ប៉ុន្តែគឺជាការគាំទ្រខាងតម្រូវការដែលមានស្ថិរភាពជាបន្តបន្ទាប់ ។ ច្រានចោលទស្សនៈលំអៀងនិងពាក្យសម្តីខុសទំនង តាមរយៈកិច្ចសហប្រតិបត្តិការនិងទិន្នន័យជាក់ស្តែង អ្វីដែល "អ្នកទិញកំពូលផុតលេខ" កំពុងបើកមិនត្រឹមតែទ្វារនៃ "ទីផ្សារពិភពលោក" ប៉ុណ្ណោះទេ ប៉ុន្តែថែមទាំងជាផ្លូវឆ្ពោះទៅរកវិបុលភាពរួមគ្នាផងដែរ៕
វិទ្យុមិត្តភាពកម្ពុជាចិន
