បទវិភាគ៖ «អ្នកលក់កំពូលផុតលេខ» ក៏ជា «អ្នកទិញកំពូលផុតលេខ» ដែរ៖ ចិនច្រានចោលពាក្យសម្តីខុសទំនងស្តីពី «ការបង្កជាសម្ពាធ» តាមរយៈការពិតជាក់ស្តែង
25-08-2026 17:33
(ប៉េកាំង)៖ ក្នុងរយៈពេល៧ខែដើមឆ្នាំនេះ ទំហំនាំចេញ-នាំចូលទំនិញរបស់ចិនបានកើនឡើង១៧,៣ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ក្នុងនោះ ការនាំចូលបានកើនឡើង២២ភាគរយ ហើយល្បឿនកំណើនបានលើសពីការនាំចេញក្នុងរយៈពេល៥ខែជាប់ៗគ្នា ។ សព្វថ្ងៃនេះ ចិនមិនត្រឹមតែជា “អ្នកលក់កំពូលផុតលេខ” លើទូទាំងពិភពលោកប៉ុណ្ណោះទេ ប៉ុន្តែក៏ជា “អ្នកទិញកំពូលផុតលេខ” ផងដែរ ។
តាំងពីចូលឆ្នាំនេះមក របាំងពាណិជ្ជកម្មសកលបានកើនឡើង ការប៉ះទង្គិចខាងភូមិសាស្ត្រនយោបាយ មានសភាពកាន់តែធ្ងន់ធ្ងរ ហើយខ្សែសង្វាក់ឧស្សាហកម្ម និងខ្សែសង្វាក់ផ្គត់ផ្គង់ពិភពលោកបានបន្តរងសម្ពាធ ។ អង្គការមូលនិធិរូបិយវត្ថុអន្តរជាតិបានព្យាករណ៍នាពេលថ្មីៗកន្លងទៅនេះថា កំណើនពាណិជ្ជកម្មសកលនៅឆ្នាំ២០២៦ នឹងបង្អង់ល្បឿនពី៥ភាគរយនៅឆ្នាំ២០២៥មកនៅត្រឹម៣,៥ភាគរយ ។ ក្នុងបរិបទបែបនេះ អ្នកនយោបាយនិងប្រព័ន្ធសារព័ត៌មានលោកខាងលិចមួយចំនួន បានឃោសនាបំប៉ោងពីអ្វីដែលហៅថា "ផលប៉ះពាល់ពីចិន២.០" និង "ពាក្យសម្តីស្តីពីការបង្កជាសម្ពាធពីចិន" ដោយអះអាងថា អតិរេកពាណិជ្ជកម្មរបស់ចិនកំពុងបង្កជា "ផលប៉ះពាល់" និង "សម្ពាធ" ដល់ទីផ្សារសកល ហើយថាការអភិវឌ្ឍនៃឧស្សាហកម្មកម្មន្តសាលរបស់ចិនបានរំលោភបំពានទៅលើលំហអភិវឌ្ឍន៍ នៃការធ្វើឧស្សាហូបនីយកម្មរបស់ប្រទេសសកលខាងត្បូង ។ ពាក្យសម្តីទាំងនេះផ្ទុយនឹងក្រឹត្យក្រមសេដ្ឋកិច្ចនិងការពិតជាមូលដ្ឋាន វាពោរពេញទៅដោយស្តង់ដារពីរនិងការព្រួយបារម្ភពីអនុត្តរភាព ហើយរងការចោទជាមន្ទិលសង្ស័យយ៉ាងទូលំទូលាយពីមតិអន្តរជាតិ ។
ការពិតគឺជាការឆ្លើយតបដ៏ល្អបំផុតចំពោះការមួលបង្កាច់និងលាបពណ៌ពីលោកខាងលិច ។ ក្នុងនាមជា"អ្នកលក់កំពូលផុតលេខ" ចិនបានបន្តផ្គត់ផ្គង់ផលិតផលដែលមានគុណភាពខ្ពស់ តម្លៃសមរម្យនិងមានស្ថិរភាពដល់ពិភពលោក ។ ឧទាហរណ៍ដូចជា បរិក្ខារគ្រឿងយន្តនិងគ្រឿងបន្លាស់ឧស្សាហកម្មរបស់ចិន បានជួយសហគ្រាសនៃប្រទេសកំពុងអភិវឌ្ឍន៍ឱ្យកាត់បន្ថយចំណាយថ្លៃដើម និងពង្រីកសមត្ថភាពផលិតកម្ម ។ ម៉ាស៊ីនត្រជាក់របស់ចិនបាននាំមកនូវភាពត្រជាក់ ដល់ប្រជាជនអឺរ៉ុបដែលកំពុងរងការវាយប្រហារពីរលកកម្តៅខ្លាំងនាពេលថ្មីៗកន្លងទៅនេះ ។ រថយន្តថាមពលថ្មីរបស់ចិន បានជួយអ្នកប្រើប្រាស់បរទេសសន្សំសំចៃដើមទុន និងទទួលបទពិសោធបើកបរកាន់តែល្អប្រសើរ......
មិនតែប៉ុណ្ណោះ ចិនបានបន្តពង្រីកការបើកទូលាយប្រកបដោយកម្រិតខ្ពស់ចំពោះបរទេស និងពង្រឹងថែមមួយកម្រិតទៀតនូវតួនាទីជា"អ្នកទិញកំពូលផុតលេខ" ដោយធ្វើឱ្យទីផ្សារធំរបស់ចិនក្លាយជាឱកាសធំរបស់ពិភពលោក។ បច្ចុប្បន្ននេះ ចិនបានរក្សាឋានៈជាប្រទេសនាំចូលធំទីពីរលើពិភពលោកក្នុងរយៈពេល១៧ឆ្នាំជាប់ៗគ្នា ដែលបានអនុវត្តគោលនយោបាយពន្ធគយសូន្យចំពោះប្រទេសចំនួន៦៣ ។ ក្នុងរយៈពេល៧ខែដើមឆ្នាំនេះ ការនាំចូលរបស់ចិនពីដៃគូពាណិជ្ជកម្មចំនួនជាង១៥០ បានសម្រេចកំណើនវិជ្ជមាន ។ តាំងពីចូលឆ្នាំនេះមក សកម្មភាពមួយចំនួន "នាំចេញទៅប្រទេសចិន" បានបើកធ្វើជាង៤០លើកទាំងក្នុងនិងក្រៅប្រទេសចិន ដែលបានជួយពង្រីកឥទ្ធិពលនៅប្រទេសចិននៃផលិតផល ដែលមានគុណភាពល្អមកពីប្រទេសជិត១០០......
បច្ចុប្បន្ននេះ ការងើបឡើងវិញនៃសេដ្ឋកិច្ចសកលមានភាពទន់ខ្សោយ ហើយតម្រូវការកំពុងធ្លាក់ចុះ ដូច្នេះ ទីផ្សារគឺជាធនធានដ៏កម្របំផុត ។ ពីកសិផលដល់គ្រឿងបន្លាស់ ពីគ្រឿងអលង្ការដល់ឧបករណ៍វេជ្ជសាស្ត្រ ចិនបន្តពង្រីកការនាំចូល ដែលមិនត្រឹមតែអាចបំពេញតម្រូវការខាងផលិតកម្មនិងជីវភាពរស់នៅរបស់ប្រជាជន និងសហគ្រាសក្នុងស្រុកឱ្យកាន់តែល្អប្រសើរប៉ុណ្ណោះទេ ប៉ុន្តែថែមទាំងក៏នាំមកនូវការបញ្ជាទិញ ឱកាសការងារ និងភាគលាភអភិវឌ្ឍន៍កាន់តែច្រើន ដល់ដៃគូពាណិជ្ជកម្មផងដែរ ។
"អ្នកទិញកំពូលផុតលេខ+អ្នកលក់កំពូលផុតលេខ" — ចិនមិនត្រឹមតែមានឆន្ទៈធ្វើជា "រោងចក្រពិភពលោក" ប៉ុណ្ណោះទេ ប៉ុន្តែក៏មានឆន្ទៈធ្វើជា"ទីផ្សារពិភពលោក"ផងដែរ ។ អ្វីដែលការអភិវឌ្ឍរបស់ចិននាំមកដល់ ពិភពលោកមិនមែនជា"ផលប៉ះពាល់"នោះទេ ប៉ុន្តែគឺជាឱកាស មិនមែនជា"កម្លាំងសម្ពាធ"នោះទេ ប៉ុន្តែគឺជាការផ្តល់កម្លាំងចលករ ។ នៅពេលដែលចិននិងពិភពលោកផ្តល់ផលប្រយោជន៍ដល់គ្នាទៅវិញទៅមកកាន់តែជិតស្និទ្ធ ពាក្យសម្តីខុសទំនងគ្រប់បែបយ៉ាង ដែលប្រព័ន្ធសារព័ត៌មានលោកខាងលិចបានឃោសនាបំប៉ោងនោះ នឹងត្រូវលាតត្រដាងនិងច្រានចោលដោយឯកឯង ហើយអ្នកផងទាំងពួងក៏មានការយល់ដឹងកាន់តែស៊ីជម្រៅអំពីឱកាសចិនដែរ៕
វិទ្យុមិត្តភាពកម្ពុជាចិន
