(ដាម៉ាស់)៖ ប្រធានាធិបតីស៉ីរី លោក Ahmed Al-Sharaa នៅថ្ងៃអង្គារនេះ បានសម្តែងការអបអរសាទរចំពោះការសម្រេចរបស់សហរដ្ឋអាមេរិក ក្នុងការដកប្រទេសស៉ីរីចេញពីបញ្ជីរដ្ឋឧបត្ថម្ភភេរវកម្ម ដែលនេះជាការបោះជំហានដ៏សំខាន់ក្នុងការបន្ធូរបន្ថយទណ្ឌកម្ម ដើម្បីជំរុញការកសាង និងស្តារប្រទេសឡើងវិញក្រោយសង្គ្រាម។ នេះបើតាមការចេញផ្សាយដោយសារព័ត៌មានអន្តរជាតិ នៅថ្ងៃអង្គារ ទី២៥ ខែសីហា ឆ្នាំ២០២៦។

ថ្លែងនៅក្នុងសុន្ទរកថាមួយ លោក Sharaa បានគូសបញ្ជាក់ដូច្នេះថា «ថ្ងៃនេះ ប្រទេសស៉ីរីបានលុបលាងនូវស្នាមប្រឡាក់ដ៏ខ្មៅងងឹត និងបានបិទបញ្ចប់ទំព័រប្រវត្តិសាស្ត្រដ៏ឈឺចាប់ ដើម្បីឈានទៅរកមាគ៌ានៃការអភិវឌ្ឍ ការកសាង និងការស្តារប្រទេសឡើងវិញ»។ លោកប្រធានាធិបតីក៏បានថ្លែងអំណរគុណយ៉ាងជ្រាលជ្រៅចំពោះប្រធានាធិបតីអាមេរិក លោក ដូណាល់ ត្រាំ ព្រមទាំងបណ្តាប្រទេសជាមិត្តទាំងអស់ដែលបានឈរនៅក្បែរ និងគាំទ្រដល់ស៉ីរី។

ការសម្រេចចិត្តរបស់ទីក្រុងវ៉ាស៊ីនតោន គឺជាការលុបចោលនូវការចាត់ថ្នាក់ដែលមានអាយុកាលរាប់ទសវត្សរ៍ ភ្ជាប់ដោយការរឹតបន្តឹងសេដ្ឋកិច្ចយ៉ាងធ្ងន់ធ្ងរ ហើយត្រូវបានចាត់ទុកថាជាការបោះជំហានឆ្ពោះទៅរកភាពកក់ក្តៅនៃទំនាក់ទំនងរវាងប្រទេសទាំងពីរ បន្ទាប់ពីការដួលរលំនៃរបបដឹកនាំរបស់លោក បាសា អាល់អាសាដ (Bashar Assad) កាលពីឆ្នាំ២០២៤។

រដ្ឋមន្ត្រីក្រសួងរតនាគារអាមេរិក លោក Scott Bessent បានបញ្ជាក់ថានេះជាវិធានការមួយដែល «នឹងជួយជំរុញការវិនិយោគបន្ថែមនៅក្នុងប្រទេសស៉ីរី ដើម្បីលើកកម្ពស់ស្ថិរភាពនយោបាយ និងសេដ្ឋកិច្ច»។

គួរបញ្ជាក់ថា ក្រសួងរតនាគារអាមេរិកក៏បានសង្កត់ធ្ងន់ផងដែរថា ការដកចេញនូវការរឹតបន្តឹងលើប្រទេសស៉ីរី មិនបានផ្លាស់ប្តូរជំហររបស់សហរដ្ឋអាមេរិកក្នុងការប្រឆាំងនឹងអំពើភេរវកម្មសកល និងការប្តេជ្ញាចិត្តក្នុងការនាំយកជនបង្កអាក្រក់នៅស៉ីរីមកទទួលខុសត្រូវចំពោះមុខច្បាប់នោះឡើយ៕