(សិង្ហបុរី)៖ ប្រទេសឥណ្ឌូណេស៉ី ម៉ាឡេស៉ី និងសិង្ហបុរី បានបញ្ជាក់ជាថ្មីនូវការប្តេជ្ញាចិត្តរបស់ខ្លួន ក្នុងការធានាថា ច្រកសមុទ្រម៉ាឡាកា និងច្រកសមុទ្រសិង្ហបុរី នៅតែមានលក្ខណៈសេរី បើកចំហ និងមានសុវត្ថិភាព សម្រាប់ចរាចរណ៍ដឹកជញ្ជូនតាមផ្លូវសមុទ្រអន្តរជាតិ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃពុធ ទី២៦ ខែសីហា ឆ្នាំ២០២៦។

ច្រកសមុទ្រម៉ាឡាកា និងច្រកសមុទ្រសិង្ហបុរី គឺជាផ្លូវដឹកជញ្ជូនតាមសមុទ្រដ៏សំខាន់មួយរបស់ពិភពលោក ដោយរួមចំណែក ១ភាគ៤ នៃការដឹកជញ្ជូនទំនិញតាមផ្លូវសមុទ្ររបស់ពិភពលោក និងផ្គត់ផ្គង់ប្រេង ក៏ដូចឧស្ម័នជិត ១ភាគ៣សម្រាប់ពិភពលោក។ យោងតាមសេចក្តីថ្លែងការណ៍ នៅឯពិធីបើកវេទិកាស្ដីពីកិច្ចសហប្រតិបត្តិការលើកទី១៧ ក្នុងប្រទេសសិង្ហបុរី ឥណ្ឌូណេស៉ី ម៉ាឡេស៉ី និងសិង្ហបុរី បានបញ្ជាក់ជាថ្មីថា នាវាមានសិទ្ធិធ្វើដំណើរឆ្លងកាត់ច្រកសមុទ្រនានា ស្របតាមអនុសញ្ញាអង្គការសហប្រជាជាតិស្ដីពីច្បាប់សមុទ្រ (UNCLOS) និងច្បាប់អន្តរជាតិ។

ប្រទេសទាំង៣ ក៏បានសង្កត់ធ្ងន់លើសារៈសំខាន់នៃការគោរពសិទ្ធិ និងសេរីភាពនៃការធ្វើនាវាចរណ៍ ហើយបានលើកឡើងថា ប្រទេសដែលប្រើប្រាស់ច្រកសមុទ្រទាំងនោះ អង្គការអន្តរជាតិ វិស័យឧស្សាហកម្មដែនសមុទ្រ និងភាគីពាក់ព័ន្ធផ្សេងទៀត សុទ្ធតែមានតួនាទីរក្សាសុវត្ថិភាពការធ្វើនាវាចរណ៍ និងការពារបរិស្ថានសមុទ្រ៕