កាណាដា បញ្ចេញវិធានការដាក់ពន្ធសងសឹក១៥-៥០ភាគរយ លើទំនិញអាមេរិក ហើយប្តេជ្ញាបន្តឆ្លើយតប បើលោក ត្រាំ ពិតជាដំឡើងពន្ធទ្វេដងលើរថយន្តកាណាដា នៅដើមឆ្នាំក្រោយ
26-08-2026 13:24
(អូតាវ៉ា)៖ កាណាដា កាលពីថ្ងៃអង្គារ ទី២៥ ខែសីហា ឆ្នាំ២០២៦ បានប្រកាសពីវិធានការដាក់ពន្ធសងសឹកប្រឆាំងលើទំនិញអាមេរិក ក្នុងអត្រាចន្លោះពី ១៥ ទៅ ៥០ភាគរយ ខណៈសង្គ្រាមពាណិជ្ជកម្មកាន់តែតានតឹងខ្លាំង ឡើងរវាងប្រទេសទាំងពីរ ដែលធ្លាប់តែជាសម្ព័ន្ធមិត្តដ៏ជិតស្និទ្ធនឹងគ្នាយូរមកហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
ពន្ធគយសងសឹករបស់ទីក្រុងអូតាវ៉ា នឹងចូលជាធរមាននៅថ្ងៃទី៨ ខែកញ្ញា ដែលជាកាលកំណត់ ត្រូវបានគូសបញ្ជាក់ប៉ុន្មានថ្ងៃមុន ដោយនាយករដ្ឋមន្ត្រីកាណាដា លោក Mark Carney បន្ទាប់ពីវិធានការដាក់ពន្ធគយ ៥០ភាគរយរបស់ប្រធានាធិបតីអាមេរិក លោក ដូណាល់ ត្រាំ ប្រឆាំងមកលើផលិតផលកាណាដា បានចូលជាធរមាន កាលពីថ្ងៃសៅរ៍សប្តាហ៍មុន។
កាលពីថ្ងៃអង្គារ មន្ត្រីកាណាដាបានប្រាប់ថា ពន្ធថ្មីនេះនឹងស្មើគ្នាជាមួយកម្រិតនៃការដាក់ពន្ធគយរបស់សហរដ្ឋអាមេរិក ហើយបានប្រកាសកញ្ចប់ជំនួយ ៥,៤ពាន់លានដុល្លារ សម្រាប់ក្រុមហ៊ុននិងបុគ្គលិកកាណាដានានា ដែលរងផលប៉ះពាល់។ ទន្ទឹមនឹងនេះ រដ្ឋមន្ត្រីឧស្សាហកម្មកាណាដា លោកស្រី Melanie Joly បានថ្លែងកាលពីថ្ងៃអង្គារថា ប្រទេសរបស់លោកស្រី នឹងបន្តតតាំង ប្រសិនបើលោក ត្រាំ ពិតជាអនុវត្តតាមការគំរាមកំហែងរបស់លោក ក្នុងការដំឡើងពន្ធអាមេរិកទ្វេដងលើរថយន្តកាណាដា។
គួរបញ្ជាក់ថា កាលពីថ្ងៃសុក្រសប្តាហ៍មុន កាណាដានិងសហរដ្ឋអាមេរិក បានបរាជ័យក្នុងការឈានដល់កិច្ចព្រមព្រៀងមួយ ដើម្បីទប់ស្កាត់ពន្ធគយថ្មី ៥០ភាគរយរបស់អាមេរិក លើទំនិញកាណាដា គិតជាទំហំទឹកប្រាក់ប្រហែល ២០ពាន់លានដុល្លារ បន្ទាប់ពីមានកិច្ចប្រឹងប្រែងចរចាជាច្រើនសប្តាហ៍។ រីឯកាលពីថ្ងៃចន្ទសប្តាហ៍នេះ លោក ត្រាំ ប្រកាសគ្រោងដំឡើងពន្ធលើរថយន្តកាណាដាទ្វេដង ចាប់ពីឆ្នាំក្រោយ ដល់៥០ភាគរយ ថែមទៀតផង៕
