(ហាណូយ)៖ ទីក្រុងហូជីមិញ ដែលជាមជ្ឈមណ្ឌលពាណិជ្ជកម្មរបស់ប្រទេសវៀតណាម កំពុងស្នើឱ្យមានការរឹតបន្តឹងជាបណ្តើរៗ លើការប្រើប្រាស់យានយន្តចាក់សាំង និងម៉ាស៊ូត នៅក្នុងតំបន់កណ្តាលទីក្រុង ចាប់ពីពាក់កណ្តាលឆ្នាំ២០២៧ ដោយវិធានការនេះ គឺជាផ្នែកមួយនៃគម្រោងបង្កើតតំបន់បំភាយឧស្ម័នកាបូនទាប (LEZ)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២៦ ខែសីហា ឆ្នាំ២០២៦។

កាសែតរដ្ឋវៀតណាម Thanh Nien បានដកស្រង់សម្តីអាជ្ញាធរក្រុងឱ្យដឹងថា ទីក្រុងហូជីមិញនឹងអនុវត្តគម្រោងតំបន់ LEZ ចាប់ពីខែកក្កដា ឆ្នាំ២០២៧ នៅតំបន់កណ្តាលក្រុង និងនៅទីក្រុងថ្មី Thu Thiem គ្របដណ្តប់លើផ្ទៃដីប្រហែល ៩៣០ហិកតា។ ក្រោយសាកល្បងបាន ២ឆ្នាំ តំបន់ LEZ នឹងត្រូវពង្រីកឱ្យគ្របដណ្តប់ដល់តំបន់ផ្លូវក្រវ៉ាត់ក្រុងទី២ ចាប់ពីដើមឆ្នាំ២០២៩ ដែលជាទីតាំងមួយមានការហាមឃាត់រួចហើយ លើការចរាចររថយន្តដឹកទំនិញធុនធ្ងន់ និងរថយន្តក្រុងដែលមានកន្លែងគេង មិនឱ្យចូលមកកណ្តាលក្រុង។

កាលវិភាគចាប់ផ្តើមអនុវត្តថ្មីនេះ គឺយឺតយាវជាងសំណើពីមុន ដែលកំណត់ការអនុវត្តតំបន់ LEZ នាដើមឆ្នាំ២០២៦។ ការកែសម្រួលនេះ គឺដើម្បីឱ្យស្របទៅនឹងការដាក់ដំណើរការហេដ្ឋារចនាសម្ព័ន្ធដឹកជញ្ជូនសាធារណៈដែលមិនប៉ះពាល់បរិស្ថាន ព្រមទាំងផ្តល់ពេលដល់ពលរដ្ឋ និងអាជីវកម្មនានាឱ្យផ្លាស់ប្តូរយានយន្ត។

គួរបញ្ជាក់ថា ទីក្រុងហាណូយ ក៏បានប្រកាសកាលពីខែមិថុនា អំពីគម្រោងបញ្ឈប់ជាបណ្តើរៗនូវការប្រើប្រាស់ម៉ូតូដឹកអ្នកដំណើរ ដែលប្រើប្រេងសាំង នៅក្នុងតំបន់ដែលមានការបញ្ចេញឧស្ម័នកាបូនទាប ដោយចាប់ផ្តើមពីការដាក់កម្រិតដោយស្ម័គ្រចិត្ត រហូតឈានទៅដល់ការហាមឃាត់ទាំងស្រុង ចាប់ពីខែមករា ឆ្នាំ២០២៧៕