(អ៉ីស្លាម៉ាបាដ)៖ នាយករដ្ឋមន្ត្រីប៉ាគីស្ថានបានឱ្យដឹងថា ទារកទើបនឹងកើតយ៉ាងហោចណាស់ ១៤នាក់ បានស្លាប់បាត់បង់ជីវិត នៅក្នុងហេតុការណ៍គ្រោះអគ្គិភ័យឆាបឆេះមន្ទីរពេទ្យរដ្ឋដ៏ធំមួយកន្លែង ស្ថិតក្នុងរដ្ឋធានីអ៉ីស្លាម៉ាបាដ នៅព្រឹកថ្ងៃពុធនេះ ដោយរដ្ឋមន្ត្រីក្រសួងសុខាភិបាលបានបញ្ជាក់ថា មូលហេតុបណ្តាលមកពីការផ្ទុះម៉ាស៊ីនត្រជាក់នៅក្នុងបន្ទប់ថែទាំទារក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

អគ្គិភ័យបានឆាបឆេះឡើងនៅវេលាម៉ោងប្រមាណ ៧៖០០ ព្រឹក នៅជាន់ទីបីនៃអគារសុខភាពមាតា និងទារក ក្នុងវិទ្យាស្ថានវិទ្យាសាស្ត្រវេជ្ជសាស្ត្រប៉ាគីស្ថាន (PIMS)។ រដ្ឋមន្ត្រីក្រសួងសុខាភិបាល បានប្រាប់ទូរទស្សន៍ថា «អគ្គិភ័យបានផ្ទុះឡើងបន្ទាប់ពីមានការផ្ទុះម៉ាស៊ីនត្រជាក់មួយគ្រឿង» ដោយសារធាតុអុកស៊ីសែនយ៉ាងច្រើននៅក្នុងបន្ទប់ បានធ្វើឱ្យអណ្តាតភ្លើងឆាបឆេះរាលដាលយ៉ាងលឿន។ បើតាមប្រភពព័ត៌មាន នៅពេលកើតហេតុមានទារកទើបនឹងកើតចំនួន ១៦នាក់នៅក្នុងបន្ទប់នោះ ដោយមានទារកតែម្នាក់គត់ត្រូវបានជួយសង្គ្រោះទាន់ពេលវេលា។

ហេតុការណ៍ដ៏រន្ធត់នេះ បានបង្កជាការខឹងសម្បារយ៉ាងខ្លាំងពីសំណាក់ក្រុមគ្រួសារជនរងគ្រោះ ដោយឪពុកម្តាយមួយចំនួនបានចោទប្រកាន់ថា គ្មានវត្តមានគ្រូពេទ្យ ឬគិលានុបដ្ឋាយិកានៅក្នុងបន្ទប់នោះឡើយនៅពេលភ្លើងចាប់ផ្តើមឆេះ ហើយអគារនេះគ្មានប្រព័ន្ធសុវត្ថិភាពអគ្គិភ័យ និងច្រកចេញសង្គ្រោះបន្ទាន់ត្រឹមត្រូវនោះទេ។ ទោះជាយ៉ាងណា លោករដ្ឋមន្ត្រីសុខាភិបាលបានច្រានចោលការចោទប្រកាន់ពីអវត្តមានរបស់បុគ្គលិកពេទ្យ។

ជាការឆ្លើយតបជាបន្ទាន់ នាយករដ្ឋមន្ត្រីប៉ាគីស្ថាន លោក Shehbaz Sharif បានបញ្ជាឱ្យផ្អាកមុខតំណែងរដ្ឋលេខាធិការក្រសួងសុខាភិបាលភ្លាមៗ និងបានបញ្ជាឱ្យបើកការស៊ើបអង្កេតជាបន្ទាន់លើសោកនាដកម្មនេះ។

គួរបញ្ជាក់ថា នេះគឺជាគ្រោះអគ្គិភ័យនៅតាមមន្ទីរពេទ្យដ៏សាហាវបំផុតមួយនៅក្នុងប្រទេសប៉ាគីស្ថាន ក្នុងរយៈពេលប៉ុន្មានឆ្នាំចុងក្រោយនេះ ខណៈដែលប្រព័ន្ធសុខាភិបាលសាធារណៈរបស់រដ្ឋតែងតែរងការរិះគន់ពីកង្វះខាតធនធាន និងការគ្រប់គ្រងខ្សោយ៕