(ចូហាន់ណេស្បឺគ)៖ ក្រសួងបរិស្ថានរបស់ប្រទេសអាហ្រ្វិកខាងត្បូង បានឱ្យដឹងកាលពីថ្ងៃពុធសប្តាហ៍នេះថា មន្ត្រីគយបានចាប់ខ្លួនជនជាតិថៃម្នាក់ ដែលព្យាយាមលួចដឹកជញ្ជូនស៊ុតសត្វសេកចំនួន ៥០គ្រាប់ ដែលសង្ស័យថាជាប្រភេទសត្វជិតផុតពូជ ឆ្លងកាត់អាកាយានដ្ឋានធំនៃទីក្រុង Johannesburg។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃព្រហស្បតិ៍ ទី២៧ ខែសីហា ឆ្នាំ២០២៦។

តាមសេចក្តីថ្លែងការណ៍របស់ក្រសួង ជនជាតិថៃរូបនោះ អាយុ ៥០ឆ្នាំ និងត្រូវបានចាប់ខ្លួនកាលពីសប្តាហ៍មុន នៅឯអាកាសយានដ្ឋានអន្តរជាតិ OR Tambo បន្ទាប់ពីមន្ត្រីគយរកឃើញស៊ុតទាំងនោះ លាក់ទុកក្នុងកាបូបភ្ញាស់ស៊ុតដែលច្នៃឡើងដោយខ្លួនឯង ដែលបុរសរូបនោះ យកតាមខ្លួនឡើងលើយន្តហោះ។

ការស៉ើបអង្កេតបឋមបង្ហាញថា វាជាស៊ុតសត្វសេកប្រភេទជិតផុតពូជ ដែលត្រូវបានការពារក្រោមអនុសញ្ញាស្តីពីការជួញដូរអន្តរជាតិនូវប្រភេទសត្វ និងរុក្ខជាតិព្រៃជិតផុតពូជ ហៅកាត់ CITES។ ប្រសិនបើត្រូវបានកាត់ទោសថាមានកំហុស ជនសង្ស័យអាចប្រឈមនឹងការជាប់ពន្ធនាគារ រហូតដល់ ១០ឆ្នាំ ឬពិន័យជាប្រាក់ចំនួន ១០លានរ៉ង់ ស្មើនឹង ៦២៧ ០០០ដុល្លារអាមេរិក ឬអាចជាប់ទាំងពីរ។

នេះជាករណីស្រដៀងគ្នា បន្ទាប់ពីខែកក្កដាកន្លងទៅ ជនជាតិថៃម្នាក់ អាយុ ២៣ឆ្នាំ ត្រូវបានឃាត់ខ្លួននៅអាកាសយានដ្ឋាន OR Tambo ដែរ ជាមួយស៊ុតសត្វសេកចំនួន ៤១៨គ្រាប់។ ក្រសួងបរិស្ថានអាហ្រ្វិកខាងត្បូង បានលើកឡើងថា ករណីនេះបង្ហាញឱ្យឃើញពីភាពស្មុគស្មាញ និងល្បិចកលកាន់តែទំនើបរបស់បណ្តាញជួញដូរសត្វព្រៃឆ្លងដែន ហើយថាការស៉ីបអង្កេតករណីទាំងពីរ កំពុងបន្តដំណើរការ៕