(ដូហា)៖ ក្រសួងការបរទេសកាតា បានឱ្យដឹងនៅក្នុងសេចក្តីថ្លែងការណ៍មួយថារដ្ឋមន្ត្រីការបរទេសនៃប្រទេសកាតា និងអ៉ីរ៉ង់ បានជួបពិភាក្សាគ្នានៅថ្ងៃព្រហស្បតិ៍នេះ អំពីការបង្កើតច្រករបៀងដឹកជញ្ជូនទំនិញបណ្តោះអាសន្នមួយកាត់តាមច្រកសមុទ្រ Hormuz ព្រមទាំងកិច្ចព្រមព្រៀងលើការអនុវត្តគម្រោងរួមគ្នា ដើម្បីបោសសម្អាតគ្រាប់មីននៅក្នុងច្រកសមុទ្រនេះ។ នេះបើតាមការចេញផ្សាយដោយទីភ្នាក់ងារសារព័ត៌មានចិន ស៊ិនហួ។

គួរបញ្ជាក់ថា ច្រកសមុទ្រ Hormuz ដែលជាផ្លូវទឹកយុទ្ធសាស្ត្រដឹកជញ្ជូនប្រេងដ៏សំខាន់របស់ពិភពលោក បានរងការរាំងស្ទះយ៉ាងធ្ងន់ធ្ងរដោយសារតែភាពតានតឹងផ្នែកយោធា និងគ្រោះថ្នាក់ពីគ្រាប់មីនក្នុងទឹក ខណៈដែលកិច្ចខិតខំប្រឹងប្រែងការទូតក្នុងតំបន់កំពុងត្រូវបានជំរុញ ដើម្បីស្វែងរកដំណោះស្រាយបើកឱ្យដំណើរការនាវាចរណ៍ឡើងវិញជាបណ្តើរៗ៕