(តេហេរ៉ង់)៖ ប្រធានាធិបតីអ៉ីរ៉ង់ លោក Masoud Pezeshkian បានប្រកាសនៅថ្ងៃព្រហស្បតិ៍នេះ ពីការត្រៀមខ្លួនជាស្រេចរបស់ប្រទេសលោក ក្នុងការបង្កើតកិច្ចព្រមព្រៀងសន្តិសុខរួមជាមួយបណ្ដាប្រទេសជិតខាង ដោយគូសបញ្ជាក់ថា នេះ «មិនមែនចេញពីជំហរនៃភាពទន់ខ្សោយនោះទេ ប៉ុន្តែគឺផ្អែកលើបទពិសោធសង្គ្រាមរបស់ខ្លួនផ្ទាល់»។ នេះបើតាមការចេញផ្សាយដោយទីភ្នាក់ងារសារព័ត៌មាន Xinhua។

ថ្លែងក្នុងពិធីបើកសន្និសីទអន្តរជាតិស្ដីពីការរួបរួមឥស្លាម លើកទី៤០ នៅរដ្ឋធានីតេហេរ៉ង់ លោក Pezeshkian បានស្នើឱ្យបណ្ដាប្រទេសកាន់សាសនាឥស្លាម ចុះសន្ធិសញ្ញាសន្តិសុខមិនឈ្លានពានគ្នា គោរពបូរណភាពទឹកដី និងជៀសវាងការអនុញ្ញាតឱ្យប្រើប្រាស់ដែនដី ឬដែនអាកាសរបស់ខ្លួនដើម្បីវាយប្រហាររដ្ឋឥស្លាមដទៃទៀត ព្រមទាំងបានអំពាវនាវឱ្យសហការគ្នាក្នុងការគ្រប់គ្រងសន្តិសុខតំបន់ និងជំរុញកិច្ចសហប្រតិបត្តិការពាណិជ្ជកម្ម ការវិនិយោគ និងថាមពលស្អាត។

គួរបញ្ជាក់ថា សន្និសីទអន្តរជាតិស្ដីពីការរួបរួមឥស្លាម លើកទី៤០ នេះ បានចាប់ផ្ដើមដំណើរការកាលពីថ្ងៃព្រហស្បតិ៍ និងគ្រោងបន្តរហូតដល់ថ្ងៃអាទិត្យ ទី៣០ ខែសីហា ឆ្នាំ២០២៦ ខាងមុខនេះ៕