(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃព្រហស្បតិ៍ ទី២៧ ខែសីហា ឆ្នាំ២០២៦ បានទទូចថាប្រធានាធិបតីរុស្ស៉ី លោក វ្ល៉ាឌីមៀ ពូទីន នឹងមិនបើកការវាយប្រហារលើទឹកដី NATO នោះទេ ដែលនេះជាការនិយាយសម្រាលស្ថានការណ៍ បន្ទាប់ពីមានរបាយការណ៍ថាទីក្រុងវ៉ាស៊ីនតោនបានព្រមានទីក្រុងមូស្គូកុំឱ្យវាយប្រហារលើរដ្ឋជាសមាជិកណាមួយរបស់បក្សសម្ព័ន្ធយោធាមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការកត់សម្គាល់បែបនេះរបស់លោក ត្រាំ ធ្វើឡើងជាការឆ្លើយតបទៅនឹងការសាកសួរថាតើលោក ពូទីន បានយល់ព្រមថានឹងមិនវាយប្រហារលើទឹកដី NATO ដែរឬក៏យ៉ាងណា? លោក ត្រាំ បានគូសបញ្ជាក់ប្រាប់ក្រុមអ្នកសារព័ត៌មាននៅឯសេតវិមានដូច្នេះថា «ខ្ញុំមានកិច្ចសន្ទនាដ៏ល្អជាមួយលោក (លោក ពូទីន)។ លោកនឹងមិនវាយប្រហារលើទឹកដី NATO នោះទេ»។

គួរបញ្ជាក់ថា ក្នុងសប្ដាហ៍នេះ កាសែតអាមេរិក Wall Street Journal និងទូរទស្សន៍ CBS News បានរាយការណ៍ថានាយក CIA លោក Ratcliffe បានព្យាយាមបញ្ចុះបញ្ចូល និងព្រមានកុំឱ្យរុស្ស៉ីបើកការវាយប្រហារលើរដ្ឋជាសមាជិកណាមួយរបស់ NATO ក្រោយចារកម្មអាមេរិកបានវាយតម្លៃថាទីក្រុងមូស្គូអាចនឹងព្យាយាមធ្វើតេស្ដលើសាមគ្គីភាព និងការប្ដេជ្ញាចិត្តរបស់ NATO តាមរយៈការវាយប្រហារទ្រង់ទ្រាយតូចលើរដ្ឋជាសមាជិក NATO។ តាម Wall Street Journal លោក ពូទីន អាចនឹងធ្វើតេស្ដ NATO​ ជាមួយ ការវាយប្រហារទ្រង់ទ្រាយតូច នៅប៉ុន្មានខែ ឬឆ្នាំខាងមុខ។

ក៏ប៉ុន្តែ វិមានក្រឹមឡាំង បានច្រានចោលសេចក្ដីរាយការណ៍របស់ប្រព័ន្ធផ្សព្វផ្សាយអាមេរិក ដោយចាត់ទុកថាវាជាព័ត៌មានបំភិតបំភ័យ ក្រោយដំំណើរទស្សនកិច្ចរបស់នាយក CIA ទៅកាន់ទីក្រុងមូស្គូ៕