​(សេអ៊ូល)៖ កូរ៉េខាងត្បូង ជប៉ុន និងសហរដ្ឋអាមេរិក នឹងដឹកនាំការធ្វើសមយុទ្ធយោធារួមគ្នាចាប់ពីថ្ងៃទី៩ ដល់ថ្ងៃទី១១ ខែកញ្ញា ឆ្នាំ២០២៦ ដើម្បីធ្វើតេស្ដលើការត្រៀមលក្ខណៈទប់ទល់នឹងការគំរាមកំហែងដោយមីស៊ីល និងអាវុធនុយក្លេអ៊ែររបស់កូរ៉េខាងជើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសេចក្ដីថ្លែងការណ៍មួយ នៅថ្ងៃសុក្រ ទី២៨ ខែសីហា ឆ្នាំ២០២៦ អគ្គសេនាធិការចម្រុះរបស់កូរ៉េខាងត្បូងបានឱ្យដឹងថាសមយុទ្ធប្រចាំឆ្នាំ មានឈ្មោះថា Freedom Edge ដែលមានទម្រង់ការពារខ្លួនសុទ្ធសាធ នឹងត្រូវប្រព្រឹត្តទៅក្នុងដែនទឹកអន្តរជាតិចាប់ពីភាគខាងត្បូង ទៅភាគខាងកើតនៃកោះ Jeju របស់កូរ៉េខាងត្បូង។

សមយុទ្ធត្រីភាគីកើតមានឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានបញ្ជាឱ្យកាត់បន្ថយរយៈពេល និងបង្រួមការធ្វើសមយុទ្ធយោធារួមគ្នាជាមួយកូរ៉េខាងត្បូង និងបានលុបចោលការធ្វើសមយុទ្ធកងម៉ារីនរួមគ្នាដែលគ្រោងនឹងធ្វើឡើងនៅខែក្រោយ។

ការកាត់បន្ថយការធ្វើសមយុទ្ធរួមជាមួយកូរ៉េខាងត្បូង ត្រូវបានលោក ត្រាំ អះអាងថាធ្វើឡើងជាការឆ្លើយតបទៅនឹងការបដិសេធរបស់សេអ៊ូល មិនព្រមផ្ដល់ជំនួយដល់សហរដ្ឋអាមេរិកក្នុងសង្រ្គាមជាមួយអ៉ីរ៉ង់ ហើយថាសមយុទ្ធយោធាប្រចាំឆ្នាំ Ulchi Freedom Shield ​ក្នុងខែសីហានេះជាការបញ្ជូនសារខុសទៅកាន់កូរ៉េខាងជើង។ លោក ត្រាំ កំពុងព្យាយាមបើកផ្លូវឆ្ពោះទៅរកការរៀបចំកិច្ចប្រជុំកំពូលជាមួយមេដឹកនាំកូរ៉េខាងជើង លោក គីម ជុងអ៊ុន បន្ទាប់ពីមេដឹកនាំទាំង២ធ្លាប់ជួបគ្នាកាលពីឆ្នាំ២០១៨ និងឆ្នាំ២០១៩៕