(ឡាហាវ៉ាន)៖ ប្រទេសគុយបា នឹងបើកបវេសនកាលឆ្នាំសិក្សាថ្មី នាសប្តាហ៍ក្រោយ ទៅតាមការគ្រោងទុក ទោះបីកំពុងជួបប្រទះវិបត្តិធ្ងន់ធ្ងរ ដែលបានជះឥទ្ធិពលដល់វិស័យដឹកជញ្ជូន ការផ្គត់ផ្គង់អគ្គិសនី ព្រមទាំងបណ្តាលឱ្យចំនួនគ្រូបង្រៀនថយចុះ និងកង្វះខាតសម្ភារចាំបាច់នានា ដូចជាឯកសណ្ឋានសិស្សក៏ដោយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៨ ខែសីហា ឆ្នាំ២០២៦។

តាមរដ្ឋមន្ត្រីក្រសួងអប់រំគុយបា កុមារ និងយុវវ័យជិត ១,៤លាននាក់ នឹងចូលកងវិញនៅដើមខែកញ្ញា។ លោកស្រី Naima Trujillo គូសបញ្ជាក់ថា «អ្នកធ្វើការក្នុងវិស័យអប់រំគុយបា ដឹងច្បាស់អំពីផលប៉ះពាល់ធ្ងន់ធ្ងរចំពោះជីវភាពរស់នៅដែលទាំងអស់គ្នាជួបប្រទះ ដូច្នេះបវេសនកាលថ្មីនេះនឹងក្លាយជាឆ្នាំសិក្សាមួយ ដែលជម្នះការលំបាកធំដែលយើងអាចធ្វើបាន»។

អស់រយៈពេលជាយូរមកហើយ ដែលគុយបាចាត់ទុកថាប្រព័ន្ធអប់រំរបស់រដ្ឋដែលផ្តល់ជូនដោយឥតគិតថ្លៃ និងសម្រាប់ប្រជាជនទូទៅ គឺជាសមិទ្ធផលដ៏ធំបំផុតមួយរបស់ខ្លួន។ ប៉ុន្តែភាពខ្វះខាតធ្ងន់ធ្ងរ ដែលកាន់តែខ្លាំងក្លាឡើងដោយសារតែទណ្ឌកម្មរបស់សហរដ្ឋអាមេរិក ធ្វើឱ្យមនុស្សជាច្រើនចោទសួរអំពីលទ្ធភាពក្នុងការបន្តអនុវត្តប្រព័ន្ធអប់រំនេះ។

ស្ថានភាពនៃវិបត្តិកាន់តែធ្ងន់ធ្ងរឡើង ចាប់តាំងពីខែមិថុនា នៅពេលដែលសិស្សានុសិស្ស ត្រូវបានអនុញ្ញាតឱ្យសម្រាកមុនពេលកំណត់ សម្រាប់វិស្សមកាលរដូវក្តៅ ដោយសារតែបញ្ហាប្រព័ន្ធដឹកជញ្ជូន បញ្ហាអគ្គិសនី ដែលបង្កឡើងដោយការរឹតបន្តឹងវិធានការដាក់ទណ្ឌកម្ម ពីសំណាក់រដ្ឋបាលប្រធានាធិបតីអាមេរិក ដូណាល់ ត្រាំ។

តាំងពីពេលនោះមក ទីក្រុងវ៉ាស៉ីនតោនបានដាក់ទណ្ឌកម្មបន្ថែមទៀត ទៅលើមន្ត្រីគុយបាច្រើនរូប ដោយចោទប្រកាន់ពួកគេថា បានធ្វើសកម្មភាពប្រឆាំងសហរដ្ឋអាមេរិក ក្នុងគោលបំណងបង្កើនសម្ពាធលើមេដឹកនាំកុម្មុយនីស្តគុយបា។ ទីក្រុងឡាហាវ៉ានអះអាងថា សហរដ្ឋអាមេរិកកំពុងព្យាយាមបំផ្លាញសេដ្ឋកិច្ចរបស់ខ្លួន និងរារាំងមិនឱ្យខ្លួនផ្តល់សេវាកម្មចាំបាច់នានា៕