(ស៉ីដនី)៖ រដ្ឋមន្ត្រីការបរទេសអូស្រ្តាលី លោកស្រី Penny Wong បានឱ្យដឹងថា ប្រទេសអូស្ត្រាលីនឹងផ្តល់ជំនួយ ៣,៦លានដុល្លារ ដល់សហគមន៍រងផលប៉ះពាល់ដោយទឹកជំនន់តាមបណ្តោយព្រំដែននេប៉ាល់-ចិន ព្រមទាំងបញ្ជូនបុគ្គលិកផ្នែកកុងស៊ុលបន្ថែមទៅកាន់តំបន់នោះ ខណៈចំនួនជនជាតិអូស្ត្រាលីដែលកំពុងបាត់ខ្លួន កើនដល់ ៣៩នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី២៨ ខែសីហា ឆ្នាំ២០២៦។

លោកស្រី Wong បានលើឡើងក្នុងសេចក្តីថ្លែងការណ៍រួម ជាមួយរដ្ឋមន្ត្រីទទួលបន្ទុកការអភិវឌ្ឍអន្តរជាតិ លោកស្រី Anne Aly ថា «ទំហំធំធេង និងទីតាំងដាច់ស្រយាលនៃតំបន់រងផលប៉ះពាល់ នឹងជាបញ្ហាប្រឈមដ៏ធំមួយនាខាងមុខ សម្រាប់ការងារឆ្លើយតប និងស្តារឡើងវិញ»។ ថវិកា ៣,៦លានដុល្លារនឹងត្រូវបែងចែក ក្នុងកម្មវិធីស្បៀងអាហារពិភពលោក របស់អង្គការសហប្រជាជាតិ និងអង្គការមិនមែនរដ្ឋាភិបាលរបស់អូស្ត្រាលី។

អ្នកឯកទេសផ្នែកឆ្លើយតបនឹងវិបត្តិជនជាតិអូស្ត្រាលីម្នាក់ បានធ្វើដំណើរតាមយន្តហោះទៅដល់ទីក្រុងកដ្ឋមណ្ឌូ (Kathmandu) រួចហើយ ខណៈបុគ្គលិកផ្នែកមនុស្សធម៌ចំនួន ៣នាក់ នឹងចេញដំណើរទៅកាន់ទីនោះ ក្នុងរយៈពេល ៤៨ម៉ោង ដើម្បីជួយដល់បុគ្គលិកអូស្ត្រាលី ដែលកំពុងស្ថិតនៅទីនោះស្រាប់។

គួរបញ្ជាក់ថា ទឹកហូរជន់មកភ្លាមៗយ៉ាងគំហុគនៅតំបន់ព្រំដែននេប៉ាល់-ចិន បានបណ្តាលឱ្យអ្នកស្លាប់កើនដល់ជិត ៤០០នាក់ស្លាប់ ហើយច្រើនជាង ១ ០០០នាក់កំពុងបាត់ខ្លួននៅឡើយ។ ក្នុងនោះពាក់កណ្តាលគឺជាជនបរទេស៕