(ប៉ាណាម៉ា)៖ អនុប្រធានគ្រប់គ្រងព្រែកជីកប៉ាណាម៉ា លោកស្រី Ilya Espino de Marotta បានឱ្យដឹងថា នាវាដឹកឧស្ម័នឥន្ធនៈរាវ (LPG) មួយគ្រឿង បានបង់ប្រាក់ ៥,៣លានដុល្លារ ដើម្បីទទួលបានសិទ្ធិឆ្លងកាត់អាទិភាព តាមព្រែកជីកប៉ាណាម៉ា មុនពេលមានការដាក់ចេញនូវវិធាការរឹតបន្តឹងនានា ដែលបណ្តាលមកពីបាតុភូតអាកាធាតុ El Niño។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី២៨ ខែសីហា ឆ្នាំ២០២៦។

តាមសារព័ត៌មាន Bloomberg ក្រុមហ៊ុន SK Gas របស់កូរ៉េខាងត្បូង គឺជាអ្នកបង់ថ្លៃក្នុងចំនួនខ្ពស់បំផុតមិនធ្លាប់មាននេះ ដើម្បីឱ្យនាវា G Spirit ធ្វើដំណើរឆ្លងកាត់ នៅថ្ងៃទី១ ខែកញ្ញាខាងមុខ ពោលគឺ ២ថ្ងៃមុនពេលអាជ្ញាធរព្រែកជីកមួយនេះ កាត់បន្ថយចំនួនជើងនាវាឆ្លងកាត់ ដោយសារតែបាតុភូតអាកាសធាតុ El Niño។

ប៉ាណាម៉ា បានក្លាយជាប្រទេសចុងក្រោយគេនៅតំបន់អាមេរិកកណ្តាល ដែលបានប្រកាសអាសន្នពីបាតុភូតអាកាសធាតុ El Niño។ El Niño បង្កឱ្យកម្រិតទឹកក្នុងព្រែកជីកធ្លាក់ចុះទាប ដោយសារតែគ្រោះរាំងស្ងួតធ្ងន់ធ្ងរទូទាំងតំបន់។ ព្រីកជីកប៉ាណាម៉ា ដែលទទួលខុសត្រូវ ៥ភាគរយនៃការដឹកជញ្ជូនពាណិជ្ជកម្មផ្លូវសមុទ្រលើពិភពលោក នឹងកាត់បន្ថយចំនួនជើងនាវាឆ្លងកាត់ប្រចាំថ្ងៃពី ៣៦ជើង មកនៅត្រឹម ៣៤ជើង ចាប់ពីថ្ងៃទី៣ ខែកញ្ញា ហើយនឹងបន្តកាត់បន្ថយឱ្យនៅត្រឹម ៣២ជើង ក្នុងខែដដែលនោះ។

គួរបញ្ជាក់ថា នាវាដែលចង់ឆ្លងកាត់ព្រែកជីកប៉ាណាម៉ា ត្រូវកក់ជើងធ្វើដំណើរ ហើយនាវាដែលមិនបានកក់ទុកមុន ត្រូវរង់ចាំជាមធ្យម ៥ថ្ងៃ ដើម្បីអាចឆ្លងកាត់ ប៉ុន្តែមានការដេញថ្លៃមួយដែលអនុញ្ញាតឱ្យទិញសិទ្ធិឆ្លងកាត់ នៅនាទីចុងក្រោយបាន។ អាជ្ញាធរប៉ាណាម៉ា បានឱ្យដឹងតម្លៃដេញថ្លៃជាមធ្យម នៅចន្លោះខែតុលា ឆ្នាំ២០២៥ និងខែកុម្ភៈ ឆ្នាំ២០២៦ គឺប្រហែល ៥៥ ០០០ដុល្លារអាមេរិក។ ប៉ុន្តែចាប់តាំងពីខែមេសា នាវាដឹកឧស្ម័ន LPG មួយគ្រឿង សុខចិត្តបង់ប្រាក់ ៤លានដុល្លារអាមេរិក ដើម្បីមិនបាច់តម្រង់ជួរឆ្លងកាត់ ខណៈសង្គ្រាមមជ្ឈិមបូព៌ា ជំរុញឱ្យមានតម្រូវការដឹកជញ្ជូនទំនិញសំខាន់ៗ តាមផ្លូវទឹកមួយនេះ៕