(តេហេរ៉ង់)៖ ប្រធានាធិបតីនៃប្រទេសអ៉ីរ៉ង់ លោក Masoud Pezeshkian បានទទួលស្គាល់ថា ការដាក់ទណ្ឌកម្មរបស់សហរដ្ឋអាមេរិក កំពុងធ្វើឱ្យប៉ះពាល់ដល់សេដ្ឋកិច្ចអ៉ីរ៉ង់ ទោះបីជាកាលពីប៉ុន្មានថ្ងៃមុន លោកទើបតែបានអះអាងថា ទណ្ឌកម្មទាំងនេះនឹងមិនអាចសម្រេចអ្វីបានក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសៅរ៍ ទី២៩ ខែសីហា ឆ្នាំ២០២៦។

ការទទួលស្គាល់នេះកើតឡើង ចំពេលអាមេរិកកំពុងបង្កើនវិធានការដាក់ទណ្ឌកម្មថ្មីៗប្រឆាំងនឹងអ៉ីរ៉ង់ បន្ថែមលើទណ្ឌកម្មដែលមានស្រាប់ ចាប់តាំងពីឆ្នាំ២០១៨។ ក្នុងបទសម្ភាសមួយជាមួយទូរទស្សន៍រដ្ឋ កាលពីយប់ថ្ងៃសុក្រ លោក Pezeshkian បានលើកឡើងដូច្នេះថា៖ «អ្នកខ្លះនិយាយថា ទណ្ឌកម្មមិនមានផលប៉ះពាល់អ្វីទាំងអស់។ ចំពោះមនុស្សទាំងនោះ ខ្ញុំពិតជាមិនដឹងថា ត្រូវនិយាយអ្វីទេ»។ លោកបានបន្ថែមថា «យើងស្ថិតក្នុងស្ថានភាពមានសង្គ្រាម ដូច្នេះយើងត្រូវទទួលស្គាល់ពីលក្ខខណ្ឌក្នុងពេលសង្គ្រាមទាំងនេះ»។

កាលពីថ្ងៃចន្ទដើមសប្តាហ៍នេះ រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent បានបង្ហាញផែនការសម្រាប់អ្វីដែលលោកហៅថា «ការរឹតបន្តឹងផ្នែកសេដ្ឋកិច្ចរហូតដល់អ៉ីរ៉ង់ដកដង្ហើមលែងរួច» និងបានព្រមានអំពីផលវិបាកធ្ងន់ធ្ងរ ចំពោះប្រទេសដែលមិនចូលរួមក្នុងយុទ្ធនាការរបស់អាមេរិក។ វិធានការថ្មីទាំងនេះ បន្តពង្រឹងការដាក់ទណ្ឌកម្មរបស់អាមេរិកនិងសម្ព័ន្ធមិត្ត ដែលបានចាប់ផ្តើមតាំងពីឆ្នាំ២០១៨ នៅពេលប្រធានាធិបតីអាមេរិក លោក ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀងអន្តរជាតិជាមួយទីក្រុងតេហេរ៉ង់ ស្តីពីកម្មវិធីនុយក្លេអ៊ែររបស់អ៉ីរ៉ង់។

លោក Pezeshkian បាននិយាយកាលពីថ្ងៃសុក្រថា ការនាំចេញ និងការនាំចូលរបស់អ៉ីរ៉ង់ បានធ្លាក់ចុះពី២៥ភាគរយទៅ ៣៥ភាគរយ ក្នុងប៉ុន្មានខែថ្មីៗនេះ ខណៈសហរដ្ឋអាមេរិក រក្សាការបិទខ្ទប់ផ្លូវសមុទ្រចំពោះកំពង់ផែរបស់អ៉ីរ៉ង់។ លោកប្រធានាធិបតី បានបន្តថា តម្លៃប្រេងសាំងនៅអ៉ីរ៉ង់ គួរតែដំឡើង ដើម្បីស៉ីសងជាមួយការធ្លាក់ចុះនៃពាណិជ្ជកម្ម។ លោកបានបន្ថែមថា «យើងគួរតែដំឡើងតម្លៃសាំង សម្រាប់កូតាកម្រិតទី៣... ឧទាហរណ៍ ពី៥,០០០តូម៉ង់ ទៅ ១០,០០០ តូម៉ង់»។ កូតានេះសំដៅលើអត្រាការប្រើប្រាស់មួយ ក្នុងចំណោមអត្រាជាច្រើន ដែលត្រូវបានប្រើដើម្បីកំណត់តម្លៃប្រេងសាំង ដែលប្រជាជនអ៉ីរ៉ង់ត្រូវបង់។

គួរបញ្ជាក់ថា អ៉ីរ៉ង់ជាប្រទេសផលិតប្រេងដ៏ធំមួយ និងមានតម្លៃប្រេងឥន្ធនៈស្ថិតក្នុងចំណោមតម្លៃថោកបំផុតនៅលើពិភពលោក។ ប្រទេសនេះបានផ្តល់ឧបត្ថម្ភធនយ៉ាងច្រើនលើប្រេងសាំង អស់រយៈពេលជាច្រើនឆ្នាំមកនេះ ដូច្នេះការផ្លាស់ប្តូរតម្លៃប្រេងសាំង គឺជាបញ្ហាដែលមានភាពរសើបខ្លាំងខាងផ្នែកនយោបាយ។

អនុប្រធានាធិបតីអ៊ីរ៉ង់ លោក Mohammad Jafar Ghaempanah បាននិយាយកាលពីថ្ងៃពុធថា ការបិទខ្ទប់ផ្លូវសមុទ្ររបស់អាមេរិក បានរារាំងអ៉ីរ៉ង់មិនឱ្យនាំចូលប្រេងសាំងបានគ្រប់គ្រាន់ ដើម្បីបំពេញការខ្វះខាតនៃផលិតកម្មក្នុងស្រុក។ ប៉ុន្តែ លោក Pezeshkian បាននិយាយកាលពីថ្ងៃដដែលនោះថា ការបន្ថែមទណ្ឌកម្មថ្មីបំផុតរបស់អាមេរិក «នឹងមិនអាចសម្រេចបានអ្វីឡើយ»។ ពេលនោះ លោក Pezeshkian បានប្រាប់ប្រព័ន្ធផ្សព្វផ្សាយរដ្ឋដូច្នេះថា «យើងនឹងឈរយ៉ាងរឹងមាំប្រឆាំងនឹងសម្ពាធសេដ្ឋកិច្ច ដូចដែលយើងបានធ្វើកន្លងមក ហើយនឹងបន្តធ្វើដូច្នេះទៀត»។