(Niamey)៖ នៅព្រឹកថ្ងៃសៅរ៍នេះ (ម៉ោងក្នុងតំបន់) មានសំឡេងបាញ់ប្រហារ និងការផ្ទុះជាបន្តបន្ទាប់តាមតំបន់មួយចំនួនក្នុងរដ្ឋធានីនៃប្រទេសនីហ្សេ រួមទាំងនៅឯព្រលានយន្តហោះ និងក្បែរវិមានប្រធានាធិបតី ដែលជាហេតុការណ៍ត្រូវបានប្រភពព័ត៌មានចំនួន ៤បញ្ជាក់ថាជាការវាយប្រហារដោយក្រុមទាហានបះបោរ។ នេះបេីយោងតាមការចេញផ្សាយដោយទីភ្នាក់ងារសារព័ត៌មា ន Reuters នាថ្ងៃសៅរ៍ ទី២៩ ខែសីហា ឆ្នាំ២០២៦។

នៅព្រឹកថ្ងៃដដែល ប្រព័ន្ធផ្សព្វផ្សាយរដ្ឋទាំងទូរទស្សន៍ និងវិទ្យុបានផ្អាកដំណើរការ ប៉ុន្តែរដ្ឋាភិបាលបានចេញសេចក្តីថ្លែងការណ៍អំពាវនាវឱ្យមានភាពស្ងប់ស្ងាត់ និងបញ្ជាក់ថាកងកម្លាំងសន្តិសុខកំពុងចល័តកម្លាំងដើម្បីឆ្លើយតបនឹងស្ថានការណ៍។

នេះគឺជាការគំរាមកំហែងថ្មីចំពោះរបបគ្រប់គ្រងនៃលោក Abdourahamane Tiani ដែលបានដណ្តើមអំណាចតាមរយៈរដ្ឋប្រហារកាលពីឆ្នាំ ២០២៣។ លោក Tiani បានសន្យាថានឹងធ្វេីកំណែទម្រង់សន្តិសុខប្រទេសក្នុងតំបន់ Sahel មួយនេះ និងដែលជាប្រទេសផលិតអ៊ុយរ៉ាញ៉ូមដ៏សំខាន់មួយ ប៉ុន្តែការវាយប្រហារដោយក្រុមជីហាដនៅតែបន្តកើតមាន។

តាមប្រភពសន្តិសុខរបស់ប្រទេសនីហ្សេ និងលោក Yvan Guichaoua ដែលជាអ្នកស្រាវជ្រាវជាន់ខ្ពស់នៅមជ្ឈមណ្ឌលអន្តរជាតិ Bonn សម្រាប់ការសិក្សាអំពីជម្លោះ (Bonn International Centre for Conflict Studies) ការវាយប្រហារនៅពេលព្រឹកនោះបានអូសបន្លាយរយៈច្រើនម៉ោង ដោយមានការចូលរួមពីសំណាក់ទាហានមកពីតំបន់ Ouallam, Tera និង Dosso ដែលស្ថិតនៅភាគនិរតីនៃប្រទេស។ កងទ័ពនីហ្សេនៅក្នុងតំបន់នេះ បានបាត់បង់កម្លាំងច្រេីនពេលដែលប្រយុទ្ធជាមួយក្រុមដែលជាសាខារបស់ ISIS ប្រចាំតំបន់។

គួរបញ្ជាក់ថា កាលពីដើមឆ្នាំនេះ ក្រុមដែលមានទំនាក់ទំនងជាមួយក្រុម al-Qaeda និងក្រុម ISIS បានវាយប្រហារអាកាសយានដ្ឋានស៉ីវិល និងមូលដ្ឋានទ័ពអាកាស៕