(ញូវដែលី)៖ ប្រទេសឥណ្ឌាកំពុងបង្កើនការឃ្លាំមើលតំបន់ហិម៉ាឡៃដែលជាប់ព្រំដែនជាមួយប្រទេសចិន និងនេប៉ាល់ បន្ទាប់ពីគ្រោះទឹកជំនន់ដ៏សាហាវដែលបណ្តាលឱ្យមានអ្នកស្លាប់កាលពីប៉ុន្មានថ្ងៃមុននេះ ទំនងជាកេីតចេញពីបាតុភូតបាក់រលំផ្ទាំងទឹកកក។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសៅរ៍ ទី២៩ ខែសីហា ឆ្នាំ២០២៦។

ទីភ្នាក់ងារភូមិសាស្ត្ររបស់សហរដ្ឋអាមេរិក បានឱ្យដឹងថា គ្រោះមហន្តរាយថ្ងៃទី២៦ ខែសីហា នៅតាមព្រំដែនទីបេ-នេប៉ាល់ គឺបណ្តាលមកពីរលាយបាក់ផ្ទាំងទឹកកកបង្កើតបានជាកម្ទេចកម្ទីហូរច្រោះ នាំឱ្យចំនួនអ្នកស្លាប់កេីនដល់ជាង ៦០០នាក់ ខណៈជិត ៣ ០០០នាក់កំពុងបាត់ខ្លួននៅឡេីយ។ ខណៈដែលមូលហេតុពិតប្រាកដនៃការបាក់រលំមិនច្បាស់លាស់ កត្តាប្រែប្រួលអាកាសធាតុកំពុងធ្វើឱ្យផ្ទាំងទឹកកករលាយនៅទូទាំងពិភពលោក ដែលបង្កើនហានិភ័យនៃគ្រោះមហន្តរាយរបៀបនេះ។

លោក Madan Kaushik រដ្ឋមន្ត្រីគ្រប់គ្រងគ្រោះមហន្តរាយរដ្ឋ នៅរដ្ឋ Uttarakhand តំបន់ហិម៉ាឡៃប៉ែកខាងឥណ្ឌា បាននិយាយថា «ដោយសារយើងមានព្រំដែនជាមួយនេប៉ាល់ ក្នុងនាមជាប្រទេសជិតខាង ហើយក៏មានស្ថានភាពភូមិសាស្ត្រស្រដៀងគ្នា​ យើងបានស្នើឱ្យនាយកដ្ឋានរបស់យើង តាមដានផ្ទាំងទឹកកកទាំងអស់ និងបឹងទឹកកកដែលមាននៅក្នុងតំបន់»។ លោកប្រាប់ AFP ថា «យើងបានស្នើឱ្យក្រុមការងាររបស់យើងឱ្យប្រុងប្រយ័ត្ន និងតាមដានថាតើមានស្ថានភាពស្រដៀងគ្នានេះកំពុងកើតឡើងនៅកន្លែងណាមួយក្នុងរដ្ឋឬទេ»។

គួរបញ្ជាក់ថា រដ្ឋ Uttarakhand គឺជាតំបន់មួយក្នុងចំណោមតំបន់ដែលមានភាពផុយស្រួយខ្លាំងផ្នែកបរិស្ថាននៅក្នុងប្រទេសឥណ្ឌា ដោយមានបឹងដែលកើតចេញពីផ្ទាំងទឹកកកចំនួន ១ ២៦៦បឹង។ អ្នកវិទ្យាសាស្ត្របានព្រមានថា ផ្ទាំងទឹកកកនៅតំបន់ហិមាល័យ ដែលផ្តល់ប្រភពទឹកដ៏សំខាន់ដល់មនុស្សជិត ២ពាន់លាននាក់ កំពុងរលាយក្នុងល្បឿនលឿនជាងពេលណាៗទាំងអស់ដោយសារបម្រែបម្រួលអាកាសធាតុ ធ្វើឱ្យសហគមន៍ប្រឈមមុខនឹងគ្រោះមហន្តរាយមិនអាចប៉ាន់ស្មានបាន និងអាចបង្កការខូចខាតធ្ងន់ធ្ងរ៕