(ប៉េកាំង)៖ ប្រព័ន្ធផ្សព្វផ្សាយរដ្ឋចិន នៅថ្ងៃអាទិត្យ ទី៣០ ខែសីហា ឆ្នាំ២០២៦ បានរាយការណ៍ថាចំនួនអ្នកស្លាប់នៅក្នុងមហន្តរាយគ្រោះទឹកជំនន់ និងល្បាប់ភក់ដ៏សាហាវដែលបានវាយប្រហារលើតំបន់ទីបេ បានកើនឡើងដល់ ១៦នាក់ និងមនុស្ស ៥៤៦នាក់ផ្សេងទៀតបានបាត់ខ្លួន។ នេះបើតាមការដកស្រង់ចេញផ្សាយដោយទីភ្នាក់ងារសារព័ត៌មាន AFP។

គ្រោះមហន្តរាយទឹកជំនន់នាំមកជាមួយល្បាប់ភក់ដ៏សាហាវ បានវាយប្រហារលើតំបន់ព្រំដែនរវាងប្រទេសនេប៉ាល់ និងទីបេ កាលពីដើមសប្ដាហ៍កន្លងទៅនេះ។ ដោយផ្អែកលើការស្រង់សម្ដីពីក្រុមមន្ត្រីចិន CCTV បានឱ្យដឹងទៀតថាចំនួនអ្នកស្លាប់នៅខាងព្រំដែនទីបេ បានកើនដល់ ១៦នាក់ និង៥៤៦នាក់បានបាត់ខ្លួន។ តាម CCTV ក្នុងចំណោមអ្នកបាត់ខ្លួន ៥៤៦នាក់ រួមមានជនបរទេស ២៦១នាក់ ក្នុងនោះរួមមាន១០៤នាក់មកពីនេប៉ាល់ ៤៩នាក់មកពីឥណ្ឌា ៣៣នាក់មកពីឡេតូនី និង១៨នាក់ មកពីសហរដ្ឋអាមេរិក។ បូកជាមួយតួលេខពីខាងភាគីចិន និងនេប៉ាល់ បានធ្វើឱ្យចំនួនអ្នកស្លាប់កើនដល់ ៦៩១នាក់ និងជិត ៣០០០នាក់បានបាត់ខ្លួន។

CCTV ឱ្យដឹងទៀតថាអាជ្ញាធរចិនបានជូនដំណឹងទៅកាន់ស្ថានទូត និងស្ថានកុងស៊ុលរបស់បណ្ដាប្រទេសខាងលើរួចហើយ។ បន្ថែមពីលើនេះ ក្រុមមន្ត្រីចិនក៏បានកំណត់ពី មូលហេតុនៃគ្រោះមហន្តរាយនៅព្រំដែននេប៉ាល់ និងទីបេផងដែរ។ តាមទីភ្នាក់ងារសារព័ត៌មានចិន Xinhua ក្រុមអ្នកជំនាញបានសន្និដ្ឋានថានៅម៉ោងប្រហែល ១០៖៥២នាទីព្រឹក (ម៉ោងនៅប៉េកាំង) កាលពីថ្ងៃទី២៦ ខែសីហា មានផ្ទាំងទឹកកកដ៏ធំមួយនៅលើភ្នំ Lirung នៅក្នុងប្រទេសនេប៉ាល់បានបាក់រលំហូចុះពីលើភ្នំ៕