(ប៉េកាំង)៖ ចំនួនអ្នកស្លាប់នៅក្នុងគ្រោះមហន្តរាយទឹកជំនន់នៅតំបន់ព្រំដែនរវាងនេប៉ាល់ និងតំបន់ទីបេ កាលពីថ្ងៃពុធកន្លងទៅនេះបានកើនដល់ ៧៥០នាក់ និង៣០៤៤នាក់ បានបាត់ខ្លួន ខណៈក្រុមអ្នកជួយសង្រ្គោះបានឡើងទៅលើទីទួលខ្ពស់ ដ្បិតភ្លៀងធ្លាក់បានធ្វើឱ្យកម្រិតទឹកទន្លេហក់ឡើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ប្រតិបត្តិការជួយសង្រ្គោះត្រូវបានផ្អាកជាច្រើនលើក ចាប់តាំងពីថ្ងៃសុក្រមក ដោយសារតែអាកាសធាតុអាក្រក់ និងការព្រួយបារម្ភពីហានិភ័យនៃគ្រោះទឹកជំនន់ភ្លាមៗកើតឡើងសាជាថ្មី បន្ទាប់ពីកម្រិតទឹកទន្លេនៅទូទាំងតំបន់ព្រំដែននេប៉ាល់ និងទីបេ ហក់ឡើងខ្ពស់។ កាកបាទក្រហមបានវាយតម្លៃថាប្រជាជនប្រហែល ៩០ ០០០នាក់ទំនងជារងផលប៉ះពាល់ពីមហន្តរាយទឹកជំនន់លាយឡំជាមួយល្បាប់ភក់ដែលចិនអះអាងថាមានជាប់ពាក់ព័ន្ធនឹងការប្រែប្រួលអាកាសធាតុ។

នៅថ្ងៃអាទិត្យ ទី៣០ ខែសីហា ឆ្នាំ២០២៦ អាជ្ញាធរនេប៉ាល់បានឱ្យដឹងថាស្លាប់បានកើនដល់ ៧៣៤នាក់ រីឯមនុស្ស ២៤៩៨នាក់បាត់ខ្លួន និង៧៥១៤នាក់ត្រូវបានជួយសង្រ្គោះ។ នៅឯប្រទេសចិនវិញ មនុស្ស១៦នាក់ត្រូវបានរាយការណ៍ថាបានស្លាប់ក្នុងតំបន់ គិតត្រឹមល្ងាចថ្ងៃសៅរ៍ម្សិលមិញ ហើយ៥៤៦នាក់បានបាត់ខ្លួន។

តាមប្រព័ន្ធផ្សព្វផ្សាយចិន ក្នុងចំណោមមនុស្ស ៥៤៦នាក់ដែលបានបាត់ខ្លួននៅឯប៉ែកខាងទឹកដីតំបន់ទីបេ ក្នុងនោះមានជនបរទេស ២៦១នាក់ មកពីប្រទេសចំនួន២៣ រួមមាន ១០៤នាក់មកពីនេប៉ាល់ ៤៩នាក់មកពីឥណ្ឌា ព្រមទាំង ៣៣នាក់មកពីឡេតូនី ១៨នាក់មកពីសហរដ្ឋអាមេរិក និង១៥នាក់មកពីព្រីតថែន៕