(North Carolina)៖​ រដ្ឋមន្ត្រីហិរញ្ញវត្ថុអាមេរិក លោក Scott Bessent បានប្រាប់ទីភ្នាក់ងារសារព័ត៌មាន Reuters កាលពីថ្ងៃអាទិត្យ​ ទី៣០​ ខែសីហា​ ថាលោកនឹងជំរុញឱ្យប្រទេសជាសមាជិក G20 ពិនិត្យឡើងវិញនូវលក្ខខណ្ឌពាណិជ្ជកម្មជាមួយប្រទេសចិន ដែលជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយភាពអតុល្យភាពសេដ្ឋកិច្ចពិភពលោក និងដាក់សម្ពាធលើទីក្រុងប៉េកាំងឱ្យកែសម្រួលតុល្យភាពសេដ្ឋកិច្ចរបស់ខ្លួន ដោយកាត់បន្ថយការពឹងផ្អែកលើការនាំចេញ ហើយងាកទៅរកការបង្កើនការប្រើប្រាស់ក្នុងស្រុកវិញ។​

លោក Bessent បានលេីកឡេីងក្នុងបទសម្ភាសមួយមុនកិច្ចប្រជុំនៃបណ្តាថ្នាក់ដឹកនាំហិរញ្ញវត្ថុនៃក្រុមប្រទេស G20 ថាលំហូរចូលយ៉ាងគំហុកនៃទំនិញនាំចេញពីចិននាពេលបច្ចុប្បន្ន​ គឺមិនអាចបណ្តែតបណ្តោយទៅទៀតបានឡើយ ទោះបីជាស្ថានភាពពាណិជ្ជកម្មផ្ទាល់រវាងសហរដ្ឋអាមេរិក និងចិនកំពុងមានភាពប្រសើរឡើងក៏ដោយ។

លោក Bessent គូសបញ្ជាក់ថា «ពិភពលោកមិនអាចទទួលយកបានទេចំពោះចិនដែលមានអតិរេកពាណិជ្ជកម្មរហូតដល់ ១,២ទ្រីលានដុល្លារ។ សេដ្ឋកិច្ចចិនកំពុងស្ថិតក្នុងស្ថានភាពទន់ខ្សោយ ហើយពួកគេកំពុងព្យាយាមដោះស្រាយបញ្ហានេះ​ តាមរយៈការជំរុញការនាំចេញ»។​

តាមលោក Bessent សហរដ្ឋអាមេរិកបានដាក់របាំងការពារសេដ្ឋកិច្ចរបស់ខ្លួនពីទំនិញនាំចេញច្រើនប្រភេទរបស់ចិនរួចហេីយដោយការដំឡើងពន្ធខ្ពស់ និងការហាមឃាត់ទាំងស្រុងលើផលិតផលចិនមួយចំនួន រួមទាំងរថយន្ត ដែលជំរុញឱ្យចិនងាកទៅនាំចេញទំនិញទាំងនោះទៅកាន់ទីផ្សារផ្សេងទៀត ជាពិសេសគឺអឺរ៉ុប និងអាមេរិកឡាទីន៕