(Bishkek, Kyrgyzstan)៖ នាយករដ្ឋមន្ត្រីឥណ្ឌា លោក ណារិនដ្រា ម៉ូឌី បានប្រាប់ប្រធានាធិបតីរុស្ស៉ី លោក វ៉្លាឌីមៀ ពូទីន កាលពីថ្ងៃចន្ទសប្តាហ៍នេះថា សង្គ្រាមនៅអ៊ុយក្រែនចាំបាច់ត្រូវតែបញ្ចប់ ដើម្បីផលប្រយោជន៍របស់មនុស្សជាតិ ហើយថាទីក្រុងញូវដេលី នឹងគាំទ្ររាល់កិច្ចខិតខំប្រឹងប្រែងស្វែងរកសន្តិភាព។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១ ខែកញ្ញា ឆ្នាំ២០២៦។

នៅពេលចាប់ផ្តើមជជែកជាមួយលោក លោក ពូទីន ក្នុងទីក្រុង Bishkek នៃប្រទេសកៀហ្ស៉ីស៉ីស្ថាន លោក ម៉ូឌី បានហៅលោក ពូទីន ថា «មិត្តសម្លាញ់» និងបានកោតសរសើរចំពោះទំនាក់ទំនងសេដ្ឋកិច្ចនៃប្រទេសទាំងពីរ ជាមួយការលើកឡើងថាទំនាក់ទំនងនេះ កើតឡើងដោយសារតែការផ្តល់អាទិភាពខ្ពស់ដល់ផលប្រយោជន៍គ្នាទៅវិញទៅមក។

លោក ម៉ូឌី ដែលធ្លាប់លើកឡើងថាលោកចង់ឃើញដំណោះស្រាយសន្តិភាពសម្រាប់អ៊ុយក្រែន បានគូសបញ្ជាក់ថា «សង្រ្គាមដែលបន្តរាល់ថ្ងៃ គឺស្មើនឹងការណ៍ធ្វើឱ្យមនុស្សជាតិថយក្រោយមួយជំហាន។ យើងចាំបាច់ត្រូវផ្លាស់ប្តូរពីសង្គ្រាមគ្មានទីបញ្ចប់ ទៅរកការបញ្ចប់ និងបញ្ឈប់អរិភាព ហើយយើងចាំបាច់ត្រូវដើរទៅក្នុងទិសដៅនេះយ៉ាងពិតប្រាកដ»។ លោក ពូទីន បានឆ្លើយតបវិញយ៉ាងដូច្នេះថា «សូមអរគុណយ៉ាងខ្លាំង លោកនាយករដ្ឋមន្ត្រី។ យើងកំពុងបន្តដំណើរទៅមុខតាមផ្លូវនេះហើយ»។

គួរបញ្ជាក់ថា ឥណ្ឌា រួមជាមួយចិន គឺជាម៉ូយទិញប្រេងធំបំផុតរបស់រុស្ស៉ី ដែលបានជួយឱ្យមូស្គូបំពេញខ្ទង់ថវិការបស់ខ្លួន ចាប់តាំងពីពេលបញ្ជូនកងទ័ពរាប់ម៉ឺននាក់ចូលឈ្លានពានអ៊ុយក្រែនក្នុងឆ្នាំ២០២២ ហើយបានរងនូវការដាក់ទណ្ឌកម្មយ៉ាងទូលំទូលាយពីបណ្តាប្រទេសលោកខាងលិច៕