(វ្ល៉ាឌីវ៉ូស្តុក)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បានថ្លែងនៅថ្ងៃព្រហស្បតិ៍នេះថា មានឱកាសក្នុងការឈានទៅដល់កិច្ចព្រមព្រៀងដើម្បីបញ្ចប់សង្គ្រាមនៅអ៊ុយក្រែន ខណៈដែលទីក្រុងកៀវបានលើកឡើងថា ខ្លួនរំពឹងថានឹងមាន «កម្លាំងចលករថ្មី» នៅក្នុងកិច្ចខិតខំប្រឹងប្រែងស្វែងរកសន្តិភាព។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣ ខែកញ្ញា ឆ្នាំ២០២៦។

ថ្លែងនៅក្នុងវេទិកាសេដ្ឋកិច្ចមួយ លោក ពូទីន បានគូសបញ្ជាក់ថា ប្រទេសមហាអំណាចរួមទាំងសហរដ្ឋអាមេរិក និងចិន បានត្រៀមខ្លួនរួចជាស្រេចដើម្បីគាំទ្រដល់ដំណោះស្រាយសន្តិភាព ប៉ុន្តែបញ្ហានេះត្រូវតែសម្រេចដោយប្រទេសដែលពាក់ព័ន្ធផ្ទាល់ គឺរុស្ស៉ី និងអ៊ុយក្រែន។ ទន្ទឹមនឹងនេះ រដ្ឋមន្ត្រីការបរទេសអ៊ុយក្រែន លោក Andrii Sybiha ក៏បានបង្ហាញក្តីរំពឹងលើការវិលត្រឡប់មកវិញនៃចលនាការទូត និងនយោបាយយ៉ាងសកម្មនៅតាមបណ្តារដ្ឋធានីនានាជុំវិញពិភពលោកផងដែរ។

គួរបញ្ជាក់ថា នេះគឺជាការវាយតម្លៃប្រកបដោយសុទិដ្ឋិនិយមដ៏កម្រមួយពីភាគីជម្លោះទាំងពីរ បន្ទាប់ពីសង្គ្រាមដ៏បង្ហូរឈាមនៅអឺរ៉ុបបានអូសបន្លាយអស់រយៈពេលជាង ៤ឆ្នាំកន្លះមកនេះ ខណៈកិច្ចចរចាសន្តិភាពចុងក្រោយបំផុតដែលសម្របសម្រួលដោយអាមេរិក ត្រូវបានធ្វើឡើងកាលពីខែកុម្ភៈកន្លងទៅ៕